په مصر کې چارواکو وئيلي چې د روس يوه مسافرالوتکه په جزيره نُما سينا کې غورځېدلې او تباه شوې ده .
د مصر د وزيراعظم د دفتر او هوابازۍ د وزارت لخوا په جاري شوي يو بيان کې د الوتکې د غورځېدو پخلی شوی او وئيل شوي چې په الوتکه کې 217 مسافر او د جهاز اووه کارمندان سواره وو .
د روس د فضائي کمپنۍ کوګاليماويا دغه ائيربس الوتکه ای – ۳۲۰ نن د خالي په ورځ د مصر د سېلګرۍ د ښار شرم الشيخ نه د روس سينټ پيټرزبرګ دپاره روانه شوه ، نو لږه شيبه پس د مرکزي سينا په علاقه کې يې د کنټرول ټاور سره رابطه کټ شوې ده .
د الوتکې د غورځېدو پخلی يوه نيم ساعت وروستو د هغې شوی چې د مصر د ائيرټريفک کنټرول لخوا الوتکې سره د رابطې کټ کېدو ووئيل شو .
د الوتکې لټون شورو کړی شوی او پېښه کې د وژنو کره شمېره مخې ته نه ده راغلې .
