راپورونه وايي د پاکستان پلازمينه اسلام اباد کې د بجلۍ د محکمې د يو کارمند د وژنې په تور کې د پوځ يو افسر او د هغه مرستيال نيول شوي دي .
د پوليس په وينا د اسلام اباد د بجلۍ محکمې (ائيسکو) يو مرستيال لائن مېن محبوب احمد د بِل نه ورکولو په وجه د شورو په ورځ د ډيفنس فېز ټو علاقې ته د مېجر زاهد کور ته تلی د بجلۍ لائن قطع کولو پسې ورغلی ؤ .
مېجر زاهد تور لګولی چې ائيسکو ورپسې د تېرو څو مياشتو راهسې د بجلۍ غلط بل ورلېږو ، او په دغه خبره يې د لائن مېن سره خبرې اړولي دي .
وروستو مېجر زاهد په مبينه توګه په محبوب په تماچه ډزې کړي او وژلی يې دی ، او بيا يې د خپل يو رشته دار په مرسته مړی د ګوجرخان په علاقه کې ښخ کړی ؤ .
راپورونه وايي د ائيسکو ملازمينو د کارمند په بې درکۍ احتجاج کړی دی ، او د تفتيش وروستو مېجر زاهد پوځ ته په تحويل کې ورکړی شوی دی . او پېښه کې ککړ بل کس پوليس ته ورکړی شوی او مقدمه پرې درج کړی شوې ده .
بل لور ته د اوبو او بجلۍ مرکزي وزير د ائيسکو محکمې د کارمند وژنه غندلې او په پېښه يې افسوس څرګند کړی دی ، نوموړي د وژل شوي نوکر کورنۍ له د ۳۰لاکه روپو ورکولو اعلان کړی دی .
