د پاکستان پولې سره نزدې د هند پنجاب رياست کې د پوځ په يو فضايي اډه باندې وسله وال بريد کې څلور حمله کوؤنکي او دوه امنيتي عسکر وژل شوي دي .
د راپورونو ترمخه دغه پېښه نن د خالي په سحر د پټهان کوټ په علاقه کې رامنځته شوې ده ، او وسله والو د هند فضايي اډې باندې بريد کړی دی .
پټهان کوټ د پاکستان سره په پوله پرته علاقه ده .
ځايي چارواکو وئيلي چې بريد کوؤنکي څلور وسله وال وژل شوي ، او وسله والو سره په نښته کې دوه امنيتي عسکر وژل شوي او شپږ نور ژوبل شوي دي .
چارواکو وئيلي حالات يې قابو کړي او په علاقه کې د لټون عمليات دوام لري .
راپورونه وايي چې حمله کوؤنکو د ځواکونو ورديانې اچولې وې ، او په فضايي اډه يې بريد کړی دی .
وئيل کيږي د پټهان کوټ فضايي اډه د هند د ولقې لاندې کشمير ته په تلونکې مرکزي لار باندې موقعيت لري .
هندي فضاييه باندې دغه حمله په داسې مهال شوې چې تېره اوونۍ د هند وزيراعظم د پاکستان په لنده دوره راغلی او وئيل کېدل چې د دغه دورې سره به د دواړو ملکونو اړيکې ښې شي .
تېر کال د اګست په مياشت کې د هند په ګورداس پور علاقه کې يو پوليس سټېشن باندې وسله وال بريد شوی ؤ چې پکې لږ ترلږه اووه کسان وژل شوي وو .
