د افغانستان د کورنو چارو وزارت وایي، د حکومت مخالفه وسله وال ترهګر بريدونه د دې فشار په توګه کارول غواړي چې د سولې په خبرو کې ونډه واخلي .
د کورنو چارو د وزارت ویاند صدیق صدیقي نن د نهې په ورځ کابل کې يوې خبري غونډې ته په وينا کې ووئيل ، هر کله چې د سولې خبرې پېلیږي، د دولت مخالفه وسله وال خپلو بریدونو ته زور ورکوي .
هغه ووئیل "هرکله چې د سولې یا مذاکراتو د خبرو غږ پورته کیږي، ترهګرې ډلې هڅه کوي، چې لا په زیاتو ترهګر بریدونو لاس پورې کړي ، تر څو په یو ډول ځان په مخصوص ډول ښکاره کړي خو د افغانستان ملت د دې فشارونو لاندې نه راځي، د ترهګرو په وړاندې زموږ جګړه ملي او ختمي ده."
د کورنیو چارو وزارت دا څرګندونې په داسې حال کې کړي ، چې ټاکل شوې د روانې میاشتې په یوولسمه نیټه د پاکستان پلازمينه اسلام اباد کې د افغان سولې په تړاؤ څلور اړخیزه غونډه جوړه شي .
په دغه غونډه کې به د افغانستان، پاکستان ، امريکې او چين استازي ګډون کوي .
صدیقي خبري غونډې ته په وينا کې زياته کړه، افغان ځواکونو د ملک ختيزو صوبو په سرحدي سیمو کې د حکومت مخالفینو وسله والو په وړاندې عملیاتو کې ۱۷۶۶ وسله وال مخالفین وژلي او په دغوعملياتو کې ۱۱۳۱ نور ژوبل کړی شوي دي .
د ننګرهار د نازیانو ولسوالۍ په سرحدي سیمو کې د سرحدي پولیسو په یوه چهاپه کې ۹ بهرني جنګیالي نیول شوي ، چې د تحقیقاتو لپاره کابل ته لیږدول شوي دي .
صديقي وئيلي د نيول شوؤ کسانو نه په غټه کچه وسله هم ترلاسه کړی شوې ده .
د کورنو چارو د وزارت وياند د کابل د تیرې شپې موټربم چاؤدنې په اړه ووئيل، په دې چاودنه کې د ۹ ښځو په ګډون ۳۶ ملکي افغانان ژوبل شوي دي .
هغه وویل په چاودنه کې دوه تنه وژل شوي چې پېژندګلو یې لا نه ده شوې .
طالبانو د دې موټربم برید زمه واري منلی ده .
صدیق صدیقي ووئیل، د بلخ ولایت (صوبې) مرکز مزارشریف کې د هندپه قونصلګرۍ برید د درېو بریدکوونکو په وژل کېدو پای ته رسیدلی او افغان امنیتي ځواکونه په سیمه کې په تلاشۍ بوخت دي .
هغه وویل په دې برید کې یو پولیس وژل شوی او د ۵ پولیسو په ګډون ۹ تنه ټپیان شوي دي .
د اتوار په شپه د بلخ ولایت مرکز مزارشریف ښار کې د هند په قونصلګرۍ باندې وسله والو برید شوی وو او بيا وسله والود افغان ځواکونو سره دوامداره جګړه وکړه .
د هندي رسنیو دراپورونو له مخې په دغه برید کې هندي سفارتکارو ته د سر زیان نه دی رسېدلی .
د دغه بريد زمه واري چا په غاړه نه ده اخيستې .
