د پاکستانۍ ماډلې قنديل بلوچ په وژنه کې ککړ د هغې ورور نيول شوی او د خپلې خور" د غېرت په نوم وژنې" اعتراف يې کړی دی .
قنديل بلوچ د جمعې په شپه ملتان کې وژل شوې او مور او پلار يې پوليس ته د وژنې خبر ورکړی ؤ .
قنديل بلوچ نن د اتوار په سهار د پنجاب صوبې ډېره غازي خان سيمه کې خپله پلارنۍ علاقه شاه صدرالدين کې خاورو ته وسپارل شوه .
د قنديل په وژنه کې ککړ د هغې ورور وسيم پوليسو رسنيو ته وړاندې کړی او هغه ويلي چې د قنديل په وجه يې د کورنۍ بدنامي کېدله ، ځکه هغه ويلي وړومبۍ يې ورله د خوب ګولۍ ورکړي او بيا يې ورله ساه بنده کړې او وژلې يې ده .
فوزیه عظیم نومې دغه مشهورې پاکستانۍ ماډلې چې په قندیل بلوچ یې شهرت لرلو په نزدې ورځو کې په سوشل میډیا د خپلو متنازعه ویډیوز اؤ عکسونو خپرولو له امله شهرت پېدا کړی ؤ .
د خالي په ورځ دپاکستان دملتان سیمې د پولیسو مشر اظهراکرام خبریالانو ته ویلي ؤ قندیل بلوچ د اختردپاره د پنجاب د ملتان ښار په مظفراباد سیمه ګرین ټاؤن کې د پلار کور ته راغلې وه اؤ تر اوسه دلته میشته وه .
پوليس افسر ويلي ؤ د قندیل بلوچ د مور پلار د وینا له مخې هغه خپل ورور وسیم وژلې ده .
د پولیس مشر د وینا له مخې د قندیل بلوچ ورور دغه قتل د غیرت په نوم کړی اؤ که تر شا یې نور علتونه دي ، دا به د پلټنو څخه وروستو روښانه شي .
دا په داسې حال کې ده چې څو اونۍ وړاندې قندیل بلوچ د یو مطبوعاتي کانفرنس په وخت ویلي ؤ چې د هغې ژوند ته سخت ګواښونه پیښ دي.
هغې د کورنیو چارو د وزارت نه د تحفظ غوښتنه کړې وه .
په پاکستان کې په تیرو نزدې وختونو کې د غیرت په نوم وژنې سیوا شوي اؤ تر دې مهاله په سوؤنو جینکۍ دپاکستان بیلابیلو سیمو کې د غیرت په نوم وژل شوي دي .
قندیل بلوچ یوه پیغله ماډله وه چې اول سر کې یې د سندرو د لارې د شوبز نړۍ ته د لارې پیدا کولو هڅه کړې وه خو په سندرو کې دناکامیدو وروستو هغې ماډلنګ پیل کړو .
د ماډلنګ ترڅنګ قندیل بلوچ په سوشل میډیا خپل داسې متنازغه ویډیوز اؤ عکسونه خپرول چې هغې د پاکستان په شمول د نړۍ د ګڼو هیوادونو د خلکو توجه قندیل بلوچ ته اړولې وه .
په وروستیو ورځو کې هغې د پاکستان د یو مذهبي عالم مفتي عبدالقوي سره سیلفي عکسونه په سوشل میډیا خپاره کړي وؤ چې هغې په میډیا باندې یوه غوغا جوړه کړې وه .
د قنديل بلوچ په وژنه هم سوشل ميډيا باندې سلسله چلېدلې او تاؤده بحثونه پرې شوي دي ډېری خلکو د دغه وژنې غندنه کړې او ډېرو پرې د خفګان څرګندونه نه ده کړې .