سعودي عرب اؤ ائتلافیانو یې د خپلو غوښتنو منلو دپاره قطر ته ورکړی شوي د لسو ورځو مهلت کې د دوؤ شواروزو نوره پراختیا کړې ده.
دغه مهلت کې د پراختیا غوښتنه د کویت امیر کړې وه چې د سعودي ، متحده عرب اماراتو، بحرین اؤ مصر ترمینځ د پیدا شوې شخړې په هواري کې منځګړتوب کوي.
قطر ته د ائتلافي هیوادونو لخوا ورکړی شوی دغه لس ورځنی مهلت د اتوار په ورځ ختمیدونکی ؤ خو د مهلت ختمیدو نه وړاندې د کویت امیر شیخ صباح الاحمد الجابر الصباح د سعودي څخه غوښتنه کړې وه چې خپل مهلت باید نور هم وغځوي.
دکویت اؤ سعوي سرکاري خبري شبکو د دوشنبې په سحر ویلي چې قطر ته ورکړی شوي مهلت کې د دوؤ شواروزو یا ۴۸ ساعتو پراختیا شوې ده.
سعودي عرب اؤ ائتلافیانو یې په قطر تور لګولی ؤ چې ایران سره په ګډه ترهګرۍ ته وده ورکوي اؤ ددغه هیواد سره یې خپلې سفارتي اړیکې شلولې دي.
وروستو ائتلافي هیوادونو قطر ته د دیارلسو غوښتنو یو فهرست ورکړی ؤ چې باید په دې لسو ورځو کې عمل وکړي .
په دغو غوښتنو کې ایران سره اړیکې کمول، دقطر خبري اداره الجزیره تړل، اؤ د قطر نه د ترکیې دپوځونو ویستلو غوښتنې هم شاملې دي
دقطر د بهرنو چارو وزیر د مخه په ډاګه کړې ده چې دغه غوښتنې ورته د منلو نه دي اؤ ویلي یې دي که هیواد یې دا غوښتنو ته غاړه ږدي نو دا به داسې وي لکه دخپلې خپلواکۍ نه چې لاس پسر کیږي
