د پاکستان پنجاب صوبې حکومت د جماعت الدعوه ډلې مشر حافظ سعيد نظربندي تر دوه نورو مياشتو پورې غځولې ده.
حافظ سعيد د روان کال د جنورۍ په میاشت کې د ۹۰ ورځو دپاره په کور نظربند کړی شوی او د هغه د ډلې نور څلور غړي هم ورسره نيول شوي وو.
د جماعت الدعوه ډلې په مشر حافظ سعيد باندې د هند تور دی چې په کال ۲۰۰۸م کې په ممبۍ کې بريد لشکر طيبه ډلې کړی ؤ د کومې ډلې بانې چي حافظ سعيد دی او هغه اوس د جماعت الدعوه مشري په غاړه لری. حافظ سعيد دغه تور ردوي.
د ممبۍ په ترهګر بريدونو کې د شپږو امريکايانو په ګډون ۱۶۶ تنه وژل شوي وو. حافظ سعيد د جماعت الدعوه او فلاح انسانيت فاؤنډېشن نومې تنظيم مشر دی دا دواړه د ملګرو ملتونو امنيتي شورا او امریکا ترهګرې ډلې ګرځولي او بندېزونه يې پرې لګولي دي.
امریکا د حافظ سعيد په نيولو کې په مرسته کولو د يو کروړ ډالروانعام اعلان کړی او امریکا د جماعت الدعوه په ضد د عملیاتو کولو غوښتنه هم کوي.
د پاکستان چارواکي وايي د ملګرو ملتونو نه د بندېزونو په ترڅ کې د جماعت الدعوه په ضد اقدامات کوي.
د کورنو چارو مخکني وزير چوهدري نثارعلي خان په يو بيان کې ويلي ؤ چې جماعت الدعوه ډله د ۲۰۱۰م ډلې راهسې د پاکستان د چارواکو په څار کې ده.
حافظ سعيد له دې وړاندې هم په کور نظربند کړی شوی ؤ خو جماعت الدعوه د دې فېصلې په ضد عدالت ته تلې او عدالت بيا د کمو شواهدو له امله د هغه د نظر بندي ختمه کړې وه.
جماعت الدعوه اوس هم د حافظ سعيد د نظربندۍ په ضد عدالت ته تلې ده.
