د امريکې خارجه وزير رېکس ټېلرسن خبرداری ورکړی که پاکستان د طالبانو او نورو ترهګرو ډلې ځالې ختمې نکړې نو امريکا يې په ضد په ګام پورته کولو غور کولی شي.
د امريکا د صدر ډونلډ ټرمپ د افغانستان او سويلي اسيا په اړه د خپلې نوې پاليسۍ د اعلان يوه ورځ وروستو د سه شنبې په ورځ خبريالانو سره په خبرو کې رېکس ټېلرسن وويل که پاکستان افغان تندلارو ته د خوندي ځای ورکولو عمل دوامداره وساتو، نو امريکا يې امداد بندولی او د نان ـ نېټو دحيثيت بيرته اخستو ترڅنګ يې په نورو اقداماتو غور کولی شي.
هغه ويلی واشنګټن د اسلام اباد سره په ګډه کار کول غواړي خو د دې دپاره به پاکستان له په خپله خاوره د موجودو ترهګرو ځالې ختمول وي.
هغه زياته کړې صدر ټرمپ واضحه کړې ده چې ترهګر هر چرته وي امريکا به يې په نخښه کوي.
رېکس ټېلرسن د افغان مسلې د هواري دپاره د پاکستان او هند په ګډه مرستو هم زور راوړی دی.
هغه ويلي چې امریکا ته د درې واړو ملکونو ضرورت دی او پاکستان له د هند سره د خپل منځي اختلافاتو هېرولو او د سيمې د امن دپاره هڅې کول پکاردي.
هغه دا هم ويلي چې د پاکستان او هند سره خپلو اړيکو ته بيا کتنه کوي ځکه د افغانستان د مسلې په حل کولو کې وخت ولګېدو.
ټېلرسن د افغانستان دپاره هند يو مهم اسټرټېجک ملګری ګرځولی او ويلي دي چې د افغانستان د معاشي پرمختګ په لړ کې هند هڅې کوي.
هغه ويلي راتلونکې اوونۍ هند د افغانستان دپاره د اقتصادي غونډې کوربه توب کوي او د نوي دهلي د دغه ډول ټولو هڅو مقصد د افغانستان سره تجارت او اړيکو ته د ودې ورکولو سره په سيمه کې امن په ځای کول دي.
صدر ټرمپ د دوشنبې په ورځ د سويلي اسيا د خپلې پاليسۍ په اعلانولو کې ویلي ؤ چې پاکستان دامریکې نه د اربونو ډالرو اختسو باوجود تندلارو ته خوندي ځايونه ورکړي څوک چې د امريکا دښمن دي.
هغه ويلي ؤ که پاکستان د ترهګرو نه لاس نه اخلي نو زيات تاوان به يې هم هغه اوچتوي.
د پاکستان خارجه وزارت ويلي امریکا دې دغلطو ادعاؤ په ځای دترهګرۍ په ضد جګړه کې د پاکستان ملګرتيا وکړي.
پاکستان ترهګرو ته د ځای ورکولو تور رد کړی او ويلي يې دي د پاکستان قربانۍ د پامه غورځول شوي دي.
