د افغانستان پلازمينې کابل ښار په قلعه فتح الله علاقه کې د شيعه مسلکو د جومات سره نزدې يو ځانمرګي بريد کې لږ ترلږه ۵ تنه وژل شوي او ۲۰ نور ژوبل شوي دي.
داعش د بريد زمه واري قبوله کړې ده.
د داخله وزارت وياند نجيب دانش پخلی په ځانمرګي بريد کې د پينځه ؤ تنو د وژل کېدو او ۲۰ نورو ژوبلېدو پخلی کړی دی.
دانش په ټويټر ليکلي، دغه بريد ماسپخين په دوه بجې شوی او د بريد وروستو يو مشکوک بريدګر هم نيول شوی دی.
ځينې راپورونه وايي بريدګر درې تنه وو يو ځان ته چاؤدنه ورکړې بل نيول شوی او درېم د موقعې نه په تېښته کې بريالی شوی دی.
کابل کې شيعه مسلکې د محرم د عاشورې مراسم نمانځي.
کابل کې د شيعه ؤ د جومات سره نزدې دا بريد په داسې حال کې شوی چې چارواکو ويلي د عاشورې د مراسمو دپاره کلک امنيتي ګامونه پورته کړی شوي دي.
کابل کې د تېرې مياشتې په وروستیو کې د جمعې په ورځ د شيعه مسلمانانو په جومات شوي بريد کې ۲۸ تنه وژل شوي او د ۵۰ نه زيات کسان ژوبل شوي وو.
بريد کې ښځې، ماشومان او دوه پوليس هم هدف شوي وو.
داعش ډلې د دغه بريد زمه واري قبوله کړې وه.
پرون د پنجشنبې په ورځ د افغانستان په قندهار ولایت کې د پولیسو دمرکز ترڅنګ په یو ځانمرګي برید کې لږ ترلږه ۱۲پولیس عسکر وژل شوي اؤ ګڼ شمیر نور ژوبل شوي وو.
د دغه بريد زمه واري طالبانو منلې وه.
