امريکې د ملګرو ملتونو د امنيتي شورا هغه قرارداد وېټو کړی دی چې پکې ويل شوي د امريکا د صدر ډونلډ ټرمپ د بېت المقدس، يروشلم د اسرايل د پلازمينې اعلانولو فېصله دې رد کړی شي.
په ملګرو ملتونو کې د امريکې استازې نېکې هيلې په امنيتي شورا کې وړاندې شوي قرارداد ته د امریکايي پرېکړې سپکاوی ويلي دي.
هغې ويلي د فلسطين او اسرايل په شخړه د ملګرو ملتونو دريځ د ښه والي نه زيات د تاوان دی.
د امریکا نه علاوه د امنيتي شورا پاتې ۱۴ غړو د مصر لخوا د وړاندې کړی شوي قرارداد په حق کې رایې ورکړې ده.
په امنيتي شورا کې د امریکا نه علاوه چين، روس او فرانس کولی شي چې کوم قرارداد وېټو کړي، د قرارداد وړاندې کولو دپاره د پاتې نهه غړو خوښه اړينه وي.
د قرارداد په مسوده کې د ملګرو ملتونو په غړو هېوادونو غږ شوی ؤ چې خپلې سفارتخانې يروشلم ته د منتقل کولو څخه ډډه وکړي.
رويټرز خبري ادارې ويلي د قرارداد په مسوده کې دا هم ويل شوي چې داسې هره فېصله يا اقدام به هیڅ قانوني بڼه ونه لري چې هدف يې د بېت المقدس ښار حيثيت بدلول وي.
دغه راز دا هم ويل شوي چې داسې ټولې پرېکړې يا اقدامات به د امنيتي شورا د قراردادونو په ضد بللی شي.
فلسطين د امريکا لخوا د قرارداد وېټو کولو په غبرګون کې په امریکا سختې نيوکې کړي او ويلي يې دي دغه ګام د قبلولو وړ نه دی.
صدر ټرمپ دريځ لري چې بېت المقدس د اسرايل د پلازمينې په توګه پېژندل او هلته امريکايي سفارتخانه منتقل په حقيقت ولاړه فېصله ده هغه ويلي يروشلم نه يواځې چې د يهوديانو مرکز پاتې شوی بلکې د اسرايل د نوي رياست پلازمينه هم ده.
د بېت المقدس په اړوند د امريکايي صدر د پرېکړې يواځې اسلامي هېوادونو نا، بلکې يورپي هېوادونو يې هم مخالفت کړی دی، دوي ویلي د دغه پرېکړې نه به په منځني ختيځ کې د سولې هڅې سختې اغېزمنې شي.
