لاس رسیدونکی لینک

Breaking News

مشرف لا د بېنظیربوټو او بګټي په قتل تورن دی


د پاکستان د لومړۍ وزیراعظمې بې نظیر بوټو او بلوڅ ملتپاله اکبر بګټي په وژنه کې ککړ د پاکستان پخواني پوځي امر جنرل مشرف په ضد د (قاتل- قاتل) نعرې یو ځل بیا د سیند به ګړي-خدابخش کې وهل شوې دي.

د دیسمبر په ۲۷مه د بې نظیر بوټو د ۱۰م تلین د لمانځلو په وخت د هغې زوی بلاول بوټو پروېز مشرف د خپلې مور قاتل ګڼلی دی

پخواني وزیراعظم نوازشریف هم دوې ورځې وړاندې په سیاسي قتلونو کې د جنرل مشرف نوم اخیستی او د هغه په مقدمو کې یې د عدالتونو پر سستۍ نیوکې کړې وې

له پاکستانه بهر او د عدالتونونو له خوا مفرور ګرځول شوي پخواني پوځي ولسمشر جنرل مشرف د پیپلز ګوند په غونډه کې د ده لپاره د (قاتل- قاتل) نعرو ته په ځواب کې ویلي:

"کېدای شي په واکمنه ډله یا ایسټېبلشمنټ کې ځینو خپلسره کړیو له وسلوالو ‌طالبانو سره د بې نظیر بوټو په وژنه کې لاس لرلی وي"

پخواني پوځي ولسمشر دا هم ویلي، چې بلاول بوټو که پر هغه د خپلې مور د وژنې تورونه لګوي، نو ثبوت دې ورکړي. ده تور پورې کړی چې بلاول او نوازشریف لاس سره یو کړی، پر ده او پوځ باندې فشار اچول غواړي

د پاکستان عدالت د روان کال په اګست میاشت کې د بې نظیر بوټو د وژنې په مقدمه کې پرېکړه اورولې او پروېز مشرف یې پکې اشتهاري یا مفرور ګرځولی وو.

پروېز مشرف د بلوچستان د ملتپال بلوڅ مشر نواب اکبر بګټی په وژنه هم تورن دی، چې مقدمه یې د بلوچستان په عدالتونو کې پرله پسې څو کاله وچلېده، خو خپله جنرل مشرف ورته حاضر نه شو.

د بلوچستان د ترهګرۍ ضد عدالت تېر کال د دې مقدمې پرېکړه واوروله او پر هغه لګېدلي تورونه یې بې ځایه وبلل، خو د بګټي کورنۍ د عدالت دا پرېکړه غیرعادلانه وبلله او په ترهګرۍ ضد عدالت کې یې چېلنج کړه

پروېز مشرف په دې هم تورن دی چې د پاکستان آیین یې مات کړی او په عدالت کې د هغه په ضد مقدمه روانه ده.

پروېز مشرف په خپلو خبرو کې ویلي، خلک هېواد ته د ده پر بیرته ور ستنېدو اندېښمن او په ویره کې دي، خو وایي دی به په خپل وخت بیرته هېواد ته ځي او په ټولو مقدمو کې به عدالتونو ته مخامخ کېږي

XS
SM
MD
LG