دنوبل جائزه ګټونکې پښتنې مبارزې ملاله یوسفزئ په ژوند هندوستان کې د جوړیدونکي فلم” ګل مکئ” شوټنګ دهند د ولقې لاندې کشمیر کې پیل شوی اؤ ټاکل شوې ده دغه فلم به د روان کال جون کې نندارې ته وړاندې شي.
په فلم ګل مکئ کې دملاله یوسفزئ رول دهند د ټي وي ډرامو پیغلوټې هنرمنده ریما شیخ ترسره کوي.
ګل مکئ دملاله یوسفزئ هاغه قلمي نوم ؤ چې ددغه نامې لاندې به یې کال ۲۰۱۲م کې دسوات څخه بي بي سي دپاره خپله ډائري لیکله.
دغه فلم چې دامجدخان د هدایاتو په اساس جوړیږي پکې په سوات کې دطالبانو غلبه، دجینکو سکولونه تړل کیدل، په دغسې لمبه حالاتو کې بیا دماشومې ملالې لخوا خپله ډائرۍ کې د جینکو په سبق ټینګار کول، دطالبانو لخوا هغه په سر ویشتل، دملالۍ بیا رغیدل اؤ په ټوله نړۍ کې د تعلیم اؤ شعور خورولو هڅې ښودل کیږي.
ګل مکئ فلم کې د ریما شیخ تر څنګ مکیش رشي، ابهنیو سنګهـ، اؤ اعجاز خان هم خپل فني صلاحیتونه ښایي خو ددې ترڅنګ پکې د کشمیر د۱۵۰ څخه زیات هنرمندان هم کار کوي.
هندي ورځپاڼې هندوستان ټائمز لیکلي چې د فلم ګل مکئ شوټنګ د کشمیر په ګلمرګ،سونامرګ اؤ ډل جهیل کې شوی اؤ په کنګن نومې کلي کې به هم په لسو ورځو کې ددغه فلم شوټنګ سرته ورسیږي.
د شل کلنې ملالې یوسفزئ تعلق دخیبرپښتونخوا د سوات سیمې سره دی اؤ په هغې په نهم اکتوبر کال۲۰۱۲م کې طالبانو هاغه مهال یو وژونکی برید کړی ؤ چې عمر یې یوازې ۱۲ کاله ؤ.
په دغه برید کې ملاله یوسفزئ په سر په ګولۍ لګیدلې وه چې وروسته د علاج دپاره لندن ته یوړل شوه اؤ اوس په لندن کې دخپلو زده کړو ترڅنګ د بشري حقونو دپاره په نړیوال کچ مبارزه کوي.
هغه د نړۍ تر ټولو کم عمره پیغله ده چې دنوبیل امن جائزه یې ګټلې ده
