لاس رسیدونکی لینک

Breaking News

د مشال خان د وژنې په مقدمه کې عدالت نن فېصله اوروي


د مذهب د سپکاوي د دروغو په تور د وژل شوي مشال خان مقدمه کې عدالت نن مهمه فېصله اوروي.

د خېبرپښتونخوا په هري پور جېل کې د ترهګرۍ د مخنيوي ځانګړي عدالت د جنورۍ په ۲۳م د جرحې او بيانونو پوره کېدو وروستو نن د فرورۍ اوومه نېټه د فېصلې دپاره ټاکلې وه.

نن د مشال خان د وژنې د فېصلې اورولو په مهال د هري پور جېل نه بهر، عبدالولي خان پوهنتون مردان او د مشال کور صوابۍ کې د امنيت کلک ګامونه پورته کړی شوي دي.

د فېصلې اورونې د نېټې ټاکل کېدو په اړوند د مشال خان وکيل شهاب الدين خان خټک ډيوه رېډيو سره په خبرو کې ويلي ؤ،

" مونږ په عدالت کې د شهادتونو په رڼا کې ثابت کړه چې مشال خان بې ګناه قتل شوی او جج ته مو خواست وکړو چې ټولو ملزمانو ته د تیزندۍ سزا واوروي".

د مشال خان د قتل په تور اول ٥٧ کسان نیول او د جنورۍ په مياشت کې پکې يو بل تن اظهار نيول شوی ؤ.

خو په دغه مقدمه کې درې تنه تراوسه مفروران دي، چې پکې د پاکستان تحريک انصاف ګوند تحصيل کونسلر عارف مردانوي او د عوامي نيشنل ګوند سره تعلق لرونکی صابر مايار هم شامل دی.

د مردان د عبدالولي خان پوهنتون د ژورنالزم د څانګې زده کوونکی مشال خان د ۲۰۱۷م د اپرېل د مياشتې په ۱۳م نېټه د هغه زده کوونکو ملګرو او د پوهنتون انتظاميې د مذهب د سپکاوي په تور په تشدد وژلی ؤ.

د ٢٠١٧ کال د جولايۍ په میاشت کې د مشال خان د قضیې اورېدنه د هغه د پلار محمد اقبال لالا په خواست دپېښور ستر عدالت د مردان څخه دهري پور زندان ته د وړلو امر کړی وو.

د مشال خان پلار محمد اقبال د عدالت څخه غوښتنه کړې وه چې په مردان ښار کې مشال خان وژل شوی او دغلته اوس د قضیې دپاره دهغه او د کورنۍ د نورو غړو ورتګ له خطره ډک دی.

د جولايي ٢٠١٧ راهسې تر د ٢٧ مه جنورۍ ٢٠١٨ پورې په هري پور کې ددې قضيې هره اونۍ دوه اورېدنې روانې وې.

ښاغلي خټک ويلي ؤ چې د مشال خان د وکيلانو پېنل (ډله) د جج په کردار او د اوریدنې په طريقه هيڅ شک نه لري خو په فیصله د ناخوښۍ په حال کې ورسره د اپيل حق شته دی.

په پاکستان کې د ترهګرۍ د مخ نيوي د ځانګړي عدالت د کومې فیصلې په ضد د صوبې په ستر عدالت ( هاي کورټ) او بیا د هېواد په ستر عدالت (سپريم کورټ) کې اپیل کېدلی شي.

د مشال خان لخوا د وکيلانو په ډله کې د ښاغلي خټک څخه علاوه ایاز خان اميرالله چمکنی، فضل خان، ایازخان، سردارعبدالروف، حافظ کالا خان سليم خان او ځيني نور شامل دي .

ښاغلي اقبال په خپله یوه مرکه کې ډیوه ته ويلي وو دا ټول وکيلان ددې قضيي وکالت په خپله خوښه رضا کارانه کوي.

د خپل انداز په دې ځانګړې قضیه کې د تورن کسانو لخوا ټول ٢٢ وکیلان عدالت ته وړاندې کیږي.

د مشال خان په وژنه سترې محکمې خپل ځاني نوټس اخستی او د دغه پېښه د پلټنو دپاره يوه ګډه کمېټي جوړه کړی شوې وه..

کمېټۍ په خپل راپور کې ويلي ؤ د مشال په ضد ورته داسې هيڅ ثبوت په لاس نه ؤ ورغلی چې هغه د مذهب سپکاوی کړی وي.

XS
SM
MD
LG