لاس رسیدونکی لینک

Breaking News

چمن: پر ډیورنډ کرښه اغزن تار له خلکو کور او ګور اخلي


دا پر ډیورنډ کرښه د پاکستان له خوا غزېدلی اغزن تار دی.

پاکستاني چارواکي وایي تر قبایلي سیمو وروسته یې له چمن سره د افغانستان او پاکستان تر منځ پر ډیورنډ کرښه د اغزن تار غزولو پرېکړه کړې ده، خو ځایي خلک وایي چې دا کار به له دوی خپل کور او ګور واخلي.

پر ډیورنډ کرښه د اوسېدونکو پښتنو اندېښنو ته په ځواب کې د ملېشه ځواکونو یوه مشر بریګېډیر سهېل ویلي چې د پولې پر سر او یوې بلې غاړې ته پرتو خلکو ته به د مځکو په بدل کې پیسې یا په چمن ښار کې مځکې ورکړي:

"هغو کلیوالو ته به د خپلو کورونو په بدل کې تاوان یا معاوضه ورکول کېږي، چې د خپلو کورونو قوالې او اسناد لري"

د بلوچستان په شمالي سیمو کې د ملېشه ځواکونو د یوه کنډک قومندان بریګېډیر ندیم سهېل د چارشنبې- شورو په ورځ یوې قبایلي جرګې ته په وینا کې ویلي، چې په دې صوبه کې به هم ژر پر ډیورنډ کرښه د اغزن تار غزولو کار پیل شي.

په دې قبایلي جرګه کې- چې په چمن کې د ملېشه ځواکونو په کلا کې شوې- د چمن او شاوخوا کلیو مشرانو پکې ګډون کړی او د حکومت او امنیتي ځواکونو له چارواکو سره یې پر دې بحث کړی، چې څنګه کېدای شي پر پوله د قانوني تګ راتګ لارې عملي شي.

خو قبایلي مشرانو اندېښنه څرګنده کړې چې پر پوله د اغزن تار له غزولو سره به د دوی هدیره او مځکه په افغانستان کې پاتې شي او دوی ته به دا ګرانه وي چې د خپلو خپلوانو، وروڼو او تربرونو کورونو ته تګ راتګ وکړي.

د چمن سیمې تجارانو هم په جرګه کې اندېښنه څرګنده کړې، چې پر پوله د اغزن تار غزولو او په پاسپورټ د راتګ راتګ شرط به د دوی تجارت اغېزمن کړي، خو د ملېشه ځواکونو مشر ډاډ ورکړی، چې د تجارت او تجارانو لپاره به ستونځې نه جوړوي.

په چمن کې د افغانستان او پاکستان تر منځ د دوستۍ دروازه
په چمن کې د افغانستان او پاکستان تر منځ د دوستۍ دروازه

پاکستاني چارواکي وایي چې د چمن سیمې مربوط پر ډیورنډ کرښه تر اغزن تار غزولو وروسته به افغانانو ته په افغاني تذکرو یا شناختي کارډونو د اوښتلو اجازه نه وي او هغوی کولای شي چې په پاسپورټ یا د پاکستاني چارواکو له خوا په ورکول کېدونکو ځانګړو کارډونو یوې بلې خواته سفر وکړي.

افغان حکومت او پښتنو ملتپالو اکثر پر ډیورنډ کرښه د اغزن تار غزولو مخالفت کړی دی، ځکه چې وایي ډېر داسې کلي او کورونه دي چې د پولې پر سر پراته دي او اغزن تار به دوی ته سرخوږی جوړ کړي، خو د چمن جرګې پر دې سلا کړې ده چې د اغزن تار غزولو لپاره به هغه کورونه کډه کوي چې پر پوله پرتې دي.

پاکستان پر ډیورنډ کرښه د اغزن تار غزولو کار د ۲۰۱۷م کال په جون کې پیل کړی، چې تر اوسه یې له باجوړ، مومند او خیبراېجنسۍ سره پر پوله ۱۵۰ کیلومیټره اغزن تار لګولی دی. د پاکستان پوځ وایي د ۲۰۱۸م کال تر پایه به پر ۹۲ فیصده پوله باندې اغزن تار ولګوي، چې وایي پر دې پلان به یې ۵۵۰ میلینه ډالره خرڅ ولګېږي.

XS
SM
MD
LG