لاس رسیدونکی لینک

Breaking News

بدخشان کې د چین د پوځي اډې جوړیدو رپوټونه حقیقت نه لري


د افغانستان ملي امنیت هغه رپوټونه په کلکه رد کړل چې ګواکې چین د افغانستان په شمال کې د پوځي اډې د جوړولو هڅې پیل کړي دي.

دملي امنیت د شورا ویاند قادرشاه ویلي ، په افغانستان کې د هیوادونو د نظامي حضور د پیدا کولو پریکړه د جمهور ريیس اود پارلمان له تایید او تصویب سره تړلې ده.

هغه وویل "د رسنیو له لارې داسې خبرونه خپاره شول چې د چین ولسي جمهوریت غواړي د بدخشان په غرنیزو سیمو کې نظامي اډه جوړه کړي ، دا رپوټونه ناسم او نادرست رسنیو ته رسیدلي دي او هرهغه هیواد چې وغواړي په افغانستان کې نظامي حضور پیداکړي او یا نظامي اډه جوړه کړي ،دا د افغانستان د پارلمان او د جمهور ريیس د تایید او تصویب وروسته ته دا ډول اقدمات کیږي".

د ملي امنیت د شورا ویاند زیاته کړه ، چین هم په سیمه کې د ترهګرۍ قرباني دی او دافغانستان په شمول د سیمې له ټولو هیوادونو سره همکاري لري.

قادرشاه وايي "مونږد چین له دولت او ولس سره په دې وروستیو کې صمیمانه رسمي او سیاسي روابط لرو د خوپوځي اډې د جوړیدو په تړاو د دواړو هیوادونو د چارواکو ترمنځ هیڅ ډول خبرې نه دي شوي او دافغانستان له دولت سره د چین دنظامي مرستو بحث هغه جلا موضوع ده".

په ورته وخت کې د نړیوالو چارو سیاسي څیړونکي نصرالله ستانکزی وايي ،افغان حکومت له چین سره دستراتیژیکو همکاریو هوکړې لري او له دې مخې کیدالی شي چې له افغان دولت سره استخباراتي معلومات شریکړي ، د پوځي تجهیزات او د افغان پوځ په روزنه کې مرسته وکړي او په دې اړه چین علاقمندي لري.

نوموړي له ترهګرۍ سره دمبارزې په برخه کې د چین د رول په اړه وویل " چین د ملګرو ملتونو دامنیت شورا دایمي غړی دی ،په ډیر دقت سره کولی شي هغه هیوادونه چې د تروریزم ملاتړکوي ،دهغوی پرضد اقدمات وکړي خو دې ټکي ته باید پام ولرو ، چین طبیعتا په دې سترو لوبو کې خپلو ګټو ته او په سیمه کې خپلو ستراتیژیکو متحدینو ته پام لري او خپلې ګټې په پام کې نیسي".

په بدخشان کې د چین هیواد لخوا دپوځي اډې د جوړیدو خپاره شوي رپوټونه په داسې حال کې دافغان حکومت لخوا رد شول چې د چین له سینګیان ولایت سره افغانستان کابو ۷۵ کیلومټره ګډه پوله لري.

د افغانستان دفاع وزارت ویلي ،په بدخشان ولایت کې د ختیځ ترکستان د اسلامي تحریک په لسګونه جنګیالي فعالیت کوي او هڅه کوي چې د هیواد شمالي برخې د ناامنه کولو ترڅنګ له چین سره د ګډې پولې واوړي او دهغه هیواد سینګیانګ ایالت ترګواښ لاندې راولي.

په دې وروستیو کې ناټو ځواکونو ویلي ، دافغانستان په بدخشان ولایت کې بي ۵۲ سترو بم غور ځونکو الوتکو دترهګرو ډلو مرکزونه په نښه کړي دي.

د ناټو او امریکايي ځواکونو قومندان جنرال جان نیکلسن په بدخشان کې دترهګرو په مرکزونو دبمباریو نه وروسته ویلي ،د هیڅ یوې ترهګرې ډلې لپاره افغانستان دامن پرځای نشي بدلېدلی.

XS
SM
MD
LG