لاس رسیدونکی لینک

Breaking News

ډاکټرعبدالله: د ښځو حقونه به له طالبانو سره د سولې د خبرو قرباني نه شي


د افغانستان اجراییه رییس ډاکټر عبدالله وايي، افغان حکومت به له طالبانو سره د سولې د خبرو پر مهال د مېرمنو غوښتنې له نظره و نه غورځوي.

نوموړي وویل، د تېرو ۱۵ کالو له لاسته راوړنو څخه یوه د ښځو د حقونو مسله ده او دا به د سولې د هیڅ ډول خبرو قرباني نه شي.

ډاکټر عبدالله چې د ښځو د نړیوالې ورځې په مناسبت یې په یوه جوړه شوې غونډه کې په کابل کې خبرې کولې ژمنه وکړه چې د هېواد په پراختیا، سیاست، پوځ، کلتور او اقتصاد کې به د ښځو د ونډې ملاتړ کوي.

"افغان حکومت د سولې غږ پورته کړی او خلکو ته به هرومرو د دغو خبرو په اړه معلومات ورکول کیږي. د سولې په اړه هیڅ ډول پرېکړه د تړلو دروازو تر شا نه کیږي. د خلکو په نه شتون (غیاب یا نه حضور) کې به هیڅ هم نه کېږي".

په افغانستان کې د ملګرو ملتونو د مرستندویه ادارې یا یوناما لپاره ځانګړي استازي ټوبي لینزړ په دې غونډه کې پر افغان حکومت غږ وکړ چې له طالبانو سره دې د سولې خبرې پیل کړي.

"ملګري ملتونه له طالبانو سره د سولې د خبرو اترو په برخه کې د یو ځل بیا د غږ پورته کولو هرکلی کوي خو یو ځل بیا باید ووایم چې د سولې په هر پړاو کې د ښځو د حقونو خوندیتوب باید له پامه ونه غورځول شي".

د اجرایه ریس لومړي مرستیال محمد خان وویل، چې د ښځو د حقونو په برخه کې شعارونو ته باید عملي بڼه ورکړل شي:

"ښځې باید له خپلو حقونو څخه خبرې کړای شي".

په غونډه کې ګډون کوونکو مېرمنو له حکومت څخه وغوښتل چې دوی ته دې د زدکړو اسانتیاوې برابرې او په حکومتي ادارو کې دې ورته د کار کولو موقع ورکړل شي.

وکیلې هیلې ارشاد وویل:

"د ښځو لپاره دغه سمبولیکې دندې بس کړئ. د سولې په عالي شورا کې یواځې څو تنه ښځې دي چې د هغوی غږ هم نه اورېدل کیږي".

په ورته وخت کې په کابل کې د امریکا سفیر جان بېس وویل، په افغانستان او امریکا کې د څو نسلونو ښځو دا مبارزه کړې ده چې جنسیت د دوی په وړاندې خنډونه نه شي جوړولای. اوس هم دا مبارزه پر مخ درومي. دوی زموږ په ټولنو کې بدلون راوستی دی.

XS
SM
MD
LG