لاس رسیدونکی لینک

Breaking News

مردان: شپږ کلن ماشوم د جنسي تيري وروستو په تېزندۍ وژل شوی، د کورنۍ تور


په مردان کې احتجاج

د خېبرپښتونخوا په مردان ضلع کې د يو شپږ کلن ماشوم مړی ترلاسه شوی او کورنۍ يې تور لګولی په ماشوم يې جنسي تيری شوی او وروستو په تېزندۍ وژل شوی دی.

په مردان کې د شپږ کلن هلک د مړي ترلاسه کېدو پېښه په مدينه کالونۍ باجوړ کورونو کې رامنځته شوې او د کورنۍ خلکو يې ويلي ماشوم د شنبې، خالي په ورځ د کوره بې درکه شوی او نن سهار ورته د هغه مړی ترلاسه شوی.

د علاقې اوسېدونکو او د کم عمره هلک کورنۍ مړی د مردان، نوښار په غټ سړک احتجاجاً تر يو ساعت پورې اېښودی او غوښتنه یې کوله چې ماشوم سره جنسي تيری کوونکی او وژونکي دې ونيول شي.

د ماشوم د کورنۍ غړو ويلي، هلک پرون د سکول نه راغلی او بیا بهر وتلی ؤ بيرته کور نه ؤ راستون شوی دوي پسې تر شپې لټون کړی او پوليس يې هم خبر کړي وو خو هيڅ درک يې نه ؤ شوی.

دوي ويلي نن سهار ورته د کور سره نزدې د هلک مړی ترلاسه شوی او تور يې لګولی چې په هلک جنسي تيری شوی او بيا په تېزندۍ وژل شوی دی.

کورنۍ يې ويلي د چا سره یې شخصي دښمني يا تاؤ تريخوالی نشته.

پوليس ویلي د جنسي تيري يا د وژنې د علت په اړوند يې د طبي معائنې (پوسټ مارټم) د رپوټ مخې ته راتلو پورې څه نشي ویلی.

پوليس احتجاج کوونکو ته باور ورکړی چې په درېو ورځو کې به په پېښه کې ککړ کسان ونيسي.

د پوليس د باور وروستو د علاقې خلکو په سړک احتجاج ختم کړی او د ماشوم مړی يې خاورو ته سپارلو له وړلی دی.

مردان کې د جنورۍ په ۱۴م هم د يوې څلور کلنې ماشومې مړی ترلاسه شوی چې جنسي تیری پرې شوی ؤ، پوليسو بيا د فرورۍ په اوومه نېټه ويلي د اسما سره جنسي تيری کوونکی د هغې خپلوان ۱۵ کلن محمدنبي يې نیولی دی.

پوليسو ويلي دغه هلک يې د ډي اېن ای ټيسټ په نمونو مالوم کړی ؤ، د اسما د پېښې نوټس د سترې محکمې مشر قاضي اخستی ؤ.

XS
SM
MD
LG