په کراچۍ کې د پوليس په جعلي مقابله کې وژل شوي ځوان نقيب الله مسيد د وژنې د مقدمې اورېدنه نن په ستره محکمه کې کيږي.
د سندهـ صوبې د پوليسو مشر (ايي جي پي) الله ډنو خواجه به د نقيب الله مسيد په وژنه تورن پخواني پوليس افسر راؤ انوار د نيولو په اړوند عدالت ته رپورټ وړاندې کوي.
د سترې محکمې د مشر قاضي میا ثاقب نثار په مشرۍ درې کسيزه بېنچ چې د خپل ځاني نوټس اخستونکې مقدمې اورېدنه کوي، د جمعې د ورځې په اورېدنه کې عدالت پولیس افسر خواجه ته د دوه ورځو وخت ورکړی چې د راؤ انوار په اړوند رپوټ عدالت ته وړاندې کړي.
د صوبې د پوليس مشر ښاغلي خواجه د جمعې په ورځ ويلي ؤ د راؤ انوار په اړوند به دوه، درې ورځو کې پرمختګ وشي.
د راؤ انوار په مشرۍ پوليس ډلې د جنورۍ په ۱۳م نېټه د کراچۍ په شالطيف ټاؤن سيمه کې نقيب الله مسيد سره د درېو ملګرو په مقابله کې وژلی او ترهګر يې ورته ويلي ؤ خو د نقيب کورنۍ دغه ادعا رد کړې او بيا د پوليس پلټنيزې ډلې دا مقابله جعلي ګرځولې وه.
د نقيب الله مسید د ماورای عدالت وژنې پرضد په ګرد هېواد کې احتجاجي مظاهرې شوې او سترې محکمې د مسيد په وژنه خپل ځاني نوټس اخستی ؤ.
د نقيب الله مسيدد پلار محمد خان په مدعيت په راؤ انوار او هغه سره پوليس ډله باندې مقدمه درج شوې او د ۲۳م جنورۍ نه راؤ انوار سره د پوليس ملګرو پټ دی.
