د سعودي عرب ولي عهد محمد بن سلمان خبرداری ورکړی چې په سيمه کې د نوې جګړې نښتو د مخې نيولو دپاره نړیواله ورورولي په ايران فشار سېوا کړي کنه په راتلونکو ۱۰، ۱۵ کلونو کې د ايران سره د سعودي عرب جګړه کېدی شي.
محمد بن سلمان په نړيواله ورورولۍ غږ کړی چې په ايران نور سياسي او اقتصادي فشار واچوي تر څو ايران د نېغ په نېغ پوځي نښتې څخه په شا کړی شي.
سلمان تيره اوونۍ د واشنګټن په سفر کې وال سټریټ جنرال سره په خبرو کې ویلي، د فشار د لارې د ايران مخه نيول کېدی شي او که په دغه کار کې پاتې راځو نو په راتلونکو ۱۰، ۱۵ کلونو کې د سعودي عرب د ايران سره جګړه امکان لري.
سعودي عرب په ايران تور لګوي چې عرب هېوادونو کې لاس وهنه کوي او په ځانګړي په يمن کې د حوثي ياغيانو ملاتړ کوي.
سعودي عرب په يمن کې په کال ۲۰۱۵م کې هغه وخت هوايي پوځي بريدونه پېل کړل چې کله حوثي ياغيان د يمن په پلازمينه صنعا وروختل او د سعودي عرب ملاتړی حکومت يې نسکور کړو.
ايران د سعودي عرب دغه تورونه ردوي ګنې چې په عرب ملکونو کې لاسوهنه کوي.
د سعودي ولي عهد د يمن د شخړې هوارولو دپاره د خپل اتحاد په مشرۍ عمليات غوره انتخاب ګرځولی او په وروستيو کې ديمن نه د حوثي ياغيانو په سعودي عرب میزايلو ويشتو ته يې د هغو کمزورتیا ويلې ده.
سلمان په خپلو خبرو کې هغه دريځ بیا تکرار کړی چې اخوان المسلمين ډله ترهګر روزي او دغه ډله د ترهګرۍ تعلیم خوروي او د ترهګرۍ سبب ګرځي.
