لاس رسیدونکی لینک

Breaking News

جنسي خواهش لرونکي چينايي انجينيران پاکستان بيرته خپل هېواد ته شړلي


پاکستان هغه چينايي انجينيران او کارکوؤنکي بیرته چين ته شړلي چا چې تيره اوونۍ په پنجاب کې د جنسي خواهش په سر پولیس وهلي وو.

دغو چينايي انجينيرانو غوښتل چې لاړ شي او په خانېوال ضلع کې جنسي خواهش پوره کړي خو پوليسو دوي ته د يواځې تلو اجازه نه وه ورکړې او بيا دغو چينايانو پوليس وهلي ټکولي وو.

د چينايي انجينيرانو د پوليس سره نښتې ویډيو او عکسونه په سوشل ميډيا خپاره شوي او يو چينايي تن په يو عکس کې ليدل کېدو چې د پوليس په موبايل د پاسه ولاړ ؤ.

دغه پېښه د تير سه شنبې په ورځ د پنجاب په خانېوال ضلع کې رامنځته شوې وه چينايي انجينيرانو د سي پېک پروژې لاندې د فېصل اباد او ملتان ترمنځ موټر وی باندې کار کولو.

د ځايي میډيا ترمخه د خانېوال ضلعې د پوليس مشر رضوان عمرګوندل په دغه پېښه د پنجاب حکومت ته خط ليکلی چې چينايان قانون په لاس کې اخلي او چينايي چارواکو ته يې دغه خبر ورکړی ؤ.

راپورونه وايي نن د سه شنبې/ نهې په ورځ دغه پينځه واړه چينايي انجينيران او کارکوونکي د لاهور څخه په ځانګړې الوتکه کې بيرته چين ته شړل شوي دي.

په دغه پېښه په سوشل ميډيا ډېر بحث شوی او د پنجاب په چارواکو پکې نيوکې هم شوې وې چې د چينايانو پرضد يې قانوني ګامونه نه ؤ پورته کړي.

پاکستان چين يو نزدې دوست هېواد ګڼي او د چين پاکستان اقتصادي راهداري (سي پېک) د دغه هېواد د قسمت کنجي ګڼي.

ځايي ميډيا د چينايانو جنسي بازارونو ته تګ، د پوليس وهل ټکول او د بېنکونو لوټولو پېښې زياتې نه ښکاره کوي.

XS
SM
MD
LG