د پاکستان پوځ ویلي په بلوچستان صوبه کې د هزاره ټولنې سره تعلق لرونکو د ۱۰۰ نه زياتو کسانو په وژنه ککړ د لشکرجهنګوي ډلې مهم مشر سره د درېو ترهګرو وژل شوی دی.
په دغو عملياتو کې د پوځ يو کرنل افسر هم وژل شوی او څلور نور سرتيري ژوبل شوي دي.
ايي اېس پي ار ويلي د استخباراتي مالوماتو په اساس د بلوچستان په کلي الماس کې دغه عملیات ترسره شوي او د ځانمرګو برید کوونکو او ترهګرو ځالې پکې په نښه کړی شوي دي.
په دغو عملياتو کې د لشکرجهنګوي ډلې د بلوچستان صوبې مشر سلمان باديني سره د دوه ځانمرګو په ګډون د درېو ترهګرو وژل شوی دی.
ايي اېس پي ار ويلي په عملياتو کې د پوځ يو کرنل سهېل عابد هم وژل شوی او څلور نور سرتېري ژوبل شوي چې پکې د دوؤ روغتيايي حالت خطرناک دی.
په بلوچستان کې د شيعه هزاره ګانو د وژنو پرضد تېره میاشت يوه احتجاجي ناسته شوې او د پوځ د مشر جنرال قمر جاوېد باجوه بيا دغو احتجاج کوونکو ته ورغلی او ډاډ يې ورکړی ؤ چې د هزاره ګانو په وژنو کې د ککړو پرضد به سخت ګامونه پورته کړي.
د پاکستان د بشري حقونو کمیشن د روان کال د مارچ په ۲۰مه په یوه رپوټ کې ویلي وو، چې یواځې له ۲۰۱۱م کال راهیسې په تېرو پینځو کلونو کې په کوټه ښار کې د ترهګرۍ په بېلابېلو پېښو کې د هزاره قوم ۵۰۹ تنه وژل شوي او ۶۲۷ ټپیان شوي دي.
احتجاجي ناسته پېلوونکې جليله حېدر چې مدني فعاله او وکيله ده ويلي ؤ چې څو پورې ورته د پوځ مشر باور نه وي ورکړی دوی په احتجاج ناست وي.
جليلې د نه خوړو احتجاجي ناسته پېل کړې وه.
