لاس رسیدونکی لینک

Breaking News

امريکا وايي پاکستان يې د ‌‌‌‌‌‌ډپلوماټانو سره بد چلند کوي


د امريکې د بهرنيو چارو وزير مايک پومپيو

د امريکې د بهرنيو چارو وزير مايک پومپيو ویلي چې امريکايي چارواکو سره په پاکستان کې بد چلند کيږي او ښايي چې واشنګټن د پاکستان مالي مرستې نورې هم کمې کړي. مايک پومپيو کانګرس ته په احوال تېرولو کې دغه خبره کړې ده.

د ډان ورځپاڼې د راپور ترمخه د کانګرس د بهرنيو چارو کمېټۍ په غونډه کې د پاکستان کې امریکايي سفارتکارو سره د بد چلند خبره راپورته شوې او داسې اشاره ورکړی شوې چې يو وخت چې د اسلام اباد او واشنګټن نزدې اړیکې وې هغه قابو ختمې شوي او پاکستان اوس مخالفه چلند کوي.

مايک پومپيو د بهرنيو چارو د وزارت د راتلونکي مالي کال په بوديجه د بحث په مهال ويلي، "چې زمونږ د بهرنيو چارو د چارواکو سره بد چلند کيږي، او په سفارتخانو، قونصلګرو او نورو ځايونو کې د کارکوونکو سره د پاکستاني چارواکو رویه سمه نه ده".

نوموړي ويلي چې د صدر ټرمپ انتظاميې د تېر کال په پرتله په کال ۲۰۱۸م کې د پاکستان مالي مرستې کمې کړي او د هغه په خيال دغه شمېرې نورې هم کمېدی شي.

پومپيو دغه خبره په داسې حال کې کړې چې امريکې د پاکستان په سفارتي عمله بندېزونه لګولي دي.

د روانې مياشتې په لومړيو کې د پاکستان سفارتي عملې ته ويل شوي چې د امریکا په بیلا بیلو ښارونو کې کار کونکي سفارتي عمله د خپلو سفارتخانو نه ۲۵ میله بهر سفر نه کوي، او که څوک د دغې نه زیات سفر کول غواړي نو لومړی به د امریکا خارجه وزارت نه د دغې اجازه اخلي.

د اپریل میاشتې په ۱۷مه نېټه د امريکې مرستيال خارجه وزير تامس شېنن وي او ای ته ويلي وو، امريکې دغه ګام د پاکستان له خوا په خپل هېواد کې پر امريکايي سفارتکارانو د بنديز په غبرګون کې پورته کړی دی.

په امریکا کې د پاکستاني ډپلوماټاڼو په سفرونو د بندیز په جواب کې پاکستان هم د امریکایي ډپلوماټانو په سفرونو بندیز لګولی او امر یې کړی ؤ چې که امریکایي ډپلوماټان په هر لوري ځي وړومبی به ورته د پاکستان د خارجه دفتر څخه اجازه اخستل وي.

مايک پومپيو په خپلو خبرو کې د شکيل افريدي يادګېرنه کړې او ويلي يې دي، چې کله "زه د اسختباراتي ادارې سي ايي ای مشر ووم ما د شکيل افريدي په مسله کې د پام وړ کار کړی خو نه وم کامياب شوی، او دا خبره دې یاد وساتل شي چې هغه زما په زړه کې دی او زه د دې په ارزښت خبر يم او مونږ د دې دپاره څه کولی شو، مونږ دغه کار ترسره کولی شو".

په دغه مهال د کېليفورنيا نه د ريپبلکن د کانګرس غړي ډېنا روهرابېچر ويلي چې د ټرمپ انتظاميې ته خواست شوی چې د پاکستان دپاره راتلونکی بجټ سېوا نه کړي.

هغه ويلي، "زه داسې څه جواز نه وينم چې د بهرنيو مرستو په برخه کې د پاکستان حکومت ته نورې پېسې ورکړی شي تر هغې پورې چې د اسامه بن لادن په مالومولو کې مرسته کوونکی ډاکټر شکیل افريدی يې نه وي خوشی کړی".

د پاکستان د ځايي ميډيا ترمخه د امریکې استخباراتي ادارې سي ايي ای سره د القاعده مشر اسامه بن لادن په لټون کې د مرستې په لړ کې نیول شوي ډاکټر شکیل افریدي د خپل اووه کاله قید سزا څو ورځې وړاندې پوره کړې ده.

په کال ٢٠١١ م کې د پاکستان په اېبټ اباد ښار کې د امریکايي خصوصي ځواکونو په عملیاتو کې د بن لادن د وژل کیدو څو ورځې ورسته پاکستان ډاکټر شکیل افریدي نيولی ؤ.

نوموړي ته د فرنټر کرائم ریګولېشن یا اېف سي ار قانون لاندې ۲۳ کاله بند اورول شوی ؤ، خو بیا وروستو په کال ۲۰۱۴م کې د هغه وکیل د دغه فېصلې په ضد فاټا ټربیونل کې خواست کړی ؤ چې دې ته دې بیا کتنه وشي.

په کال ٢٠١۴ م کې د ډاکټر شکیل افریدي سزا ١٠ کلونو ته راکمه کړی شوه او په هغه لګول شوي جرمانه هم ١٠ لکه روپۍ کمه شوه.

XS
SM
MD
LG