د جنوبي وزيرستان په دوه علاقو کې د ماين په دوه چاؤدنو کې يوه ماشومه او يو د پوخ عمره تن ژوبل شوي دي.
د ځايي خلکو او انتظاميې په وېنا دا پېښې د جمعې په ورځ ناوخته د شوال او تيارزې په تحصيلونو کې رامنځته شوي دي.
ځايي خلکو ويلي په شوال تحصيل کې يو پوخ عمره تن او د تيارزې تحصيل په منتويي علاقه کې يوه کم عمره ماشومه په ځمکه کې په ښخ ماين باندې ورختلي دي.
ژوبل دواړه کسان ځايي روغتون ته وړل شوي او د دواړو د پښو ژوبلېدو ويل شوي دي.
د پښتون ژغورنې غورځنګ (پي ټي اېم) د شمېرو ترمخه په وزیرستان کې د ماين چاؤدنو دا ۹۳م پېښه ده.
پي ټي اېم وايي د کال ۲۰۱۵م راهسې په سيمه کې د ماينونو د چاؤدنو په پېښو کې تراوسه پورې لږ تر لږه ۲۰ کسانو ژوند د لاسه ورکړی دی.
په دغو پېښو کې زياتره ماشومان او ښځې او په نخښه شوي دي.
پي ټي اېم وايي په وزيرستان کې د نورو ستونزو سره د خلکو ژوند ته تر ټولو غټه خطره په ځمکه کې د ښخو ماينونو ده.
د پښتون ژغورنې غورځنګ مشر منظور پشتين نزدې يوه اوونۍ وړاندې ويلي ؤ چې په سيمه کې د ماينونه پاکولو پرضد عمليات پېل کړی شوي خو دغلته د ماينونو پاکولو دپاره راغلو چارواکو يواځې عکسونه ويستي او بيرته ستانه شوي دي.
هغه ويلي ؤ د دوی غوښتنې نه دي منل شوي.
خو د روانې میاشتې په سر کې د پاکستان د پوځ ویاند مېجر جنرال اصف غفور په يوه خبري غونډه کې ويلي ؤ چې د پي ټي اېم زیاتې غوښتنې منل شوي دي.