د پاکستان سترې محکمې د مسلم ليګ ن ګوند سره تعلق لرونکی پخوانی وزير مملکت طلال چوهدري د عدالت د سپکاوي په جرم سزا کړو او د پينځه ؤ کالو دپاره يې نااهله کړو.
د ستر عدالت جسټس ګلزار احمد په مشرۍ درې کسيزه بينچ په ۱۱ جولائي دا فېصله محفوظ کړې وه کومه چې نن د زيارت، پنجشنبې په ورځ واورول شوه.
د مطبوعاتي راپورونو ترمخه عدالت په طلال چوهدري يو لاک روپۍ جرمانه هم لګولې او د عدالت برخاست کېدو پورې يي ورته د پاکستان د ائين ارټيکل ۶۳ مادې لاندې سزا هم ورکړې ده.
طلال چوهدري ته دا سزا د کال ۲۰۱۸په ۲۴ او ۲۷ جنورۍ د عدليې پرضد وېناګانو باندې ورکړل شوې ده.
طلال چوهدري يوې جلسې ته په وېنا کې ويلي وو " يو وخت ؤ چې خانه کعبه د بوتانو ډکه وه، او نن زمونږ عدالت چې يو اعلا ترين رياستي اداره ده، د يو امر نه حلف اخيستونکو ججانو نه ډک دی".
يو بل ځايي کې يي پخواني وزير اعظم نواز شريف ته په مخاطب کولو سره ويلي ؤ " ميا صېب دا ټول بهر وغورځوه، دوي د عدالت نه بهر وغورځوه،دوي به انصاف درنکړي بلکه خپله ناانصافي به جاري ساتي".
د پاکستان د سترې محکمې مشر جسټس ثاقب نثار د طلال چوهدري د دې خبرو خپله نوټس اخستی ؤ او هغه ته يې د عدالت د سپکاوي نوټس جاري کړی ؤ.
له دې نه وړاندې هم د پاکستان مسلم ليګ ن د مشر نواز شريف په ګډون يو شمېر مشران د عدالت لخوا سزا شوي دي.
