د جنوبي وزیرستان د ۲۷ کلن زلمي نقیب الله مسيد په وژنه تورن راؤ انوار پرضد سندهـ هايکورټ هغه خواست د اورېدنې دپاره منظور کړی چې پکې د عدالت نه د راؤ انوار د ضمانت ختمولو غوښتنه شوې وه.
د نقيب مسيد د پلار محمد خان وکيلانو سندهـ هايکورټ ته درې خواستونه کړي چې پکې يو د راؤ انوار د ضمانت ختمولو ؤ.
دوېم خواست د ترهګرۍ د مخنيوي د کراچۍ د عدالت نه کوم بل عدالت ته د مقدمې د منتقل کولو دپاره شوی او په درېم خواست کې ويل شوي راؤ انوار ته سرکاري اسانيتاوې (پروټوکول) ورکول کيږي.
نن د سندهـ هایکورټ د راؤ انوار د ضمانت ختمولو خواست د اورېدنې دپاره منظور کړی او په درېم اکتوبر يې د اورېدنې دپاره څارنوال يا د سندهـ پراسيکيوټر جنرال ته خبرتيا يا نوټس جاري کړی دی.
د کراچۍ د ترهګرۍ د مخنيوي عدالت راؤ انوار ته د وژنې په قضيه کې د روان کال په لسمه جولايۍ د ضمانت منظوري ورکړې او بيا په ۲۰م جولایۍ يې د هغه سره د وسلې او چاؤدېدونکو موادو اېښودو په مقدمه کې ضمانت منظور کړی ؤ.
په ۲۱م جولايۍ د راؤ انوار په ضمانت د خوشي کولو امر شوی ؤ.
د روان کال د جنورۍ په ۱۳م نېټه د کراچۍ د ملیر ضلعې د پولیسو پخواني مشر راؤ انوار د پوليس په يوه مقابله کې د نقيب مسيد سره د درېو نورو کسانو د وژنې ويلي چې ترهګر يې وژلي دي.
خو د نقيب خپلوانو بيا دغه دعوه رد کړې او د سترې محکمې د از خود نوټس وروستو د پوليس د لوړ پوړو افسرانو يوې کمېټۍ د دغه پېښې پلټنې کړي او منلې يې وه چې نقيب مسيد په جعلي مقابله کې وژل شوی ؤ.
راؤ انوار د يادې پېښې وروسته پټ ؤ او د مارچ په مياشت کې يې ځان سترې محکمې ته وړاندې کړی او د مې په مياشت کې يې عدالت ته په ضمانت د خوشي کېدو خواست کړی ؤ.
د ځايي میډيا ترمخه سترې محکمې د راؤ انوار هغه خواست خارج کړی کوم چې پخواني پوليس افسر د ګډې پلټنيزې کمېټۍ پرضد کړی ؤ.
نن د راؤ انوار وکيل د هغه خواست د بيرته اخيستو ويلي او عدالت بيا خواست خارج کړی دی.
