واشنګټن ـــ د پاکستان د انتخاباتو مرکزي کمېشن د هېواد له مرکزي تحقیقاتي ادارې (ایف آی اې) مرسته غوښتې، چې د هغو 'ناڅرګندو' ټلیفونونو په اړه ورسره پلټنه وکړي چې د جولای د ۲۵مې د عامو انتخاباتو په شپه د ووټ ورکولو مرکزونو ته شوي وو.
د انتخاباتو کمېشن وایي، د دغو 'ناڅرګندو' ټلیفونونو په وسیله د انتخاباتي مرکزونو پر کارکوونکو فشار اچول شوی وو، چې د نتایجو د لېږدولو سیسټم دې و دروي، چې وایي له هغه وروسته په دې شپه د ووټونو نتایج ځنډول شوي وو.
ایکسپریس ټریبیون انګرېزي ورځپاڼه لیکي، چې په هغه شپه د انتخاباتو کمېشن او د شناختي کارډ جوړولو مرکزي ادارې (نادرا) پر یوه بل د دې سیسټم د ناکاره کېدو تورونه پورې کول، خو وایي سیاسي ګوندونه دا په ټاکنو کې درغلي بللې وه.
د شورو- چارشنبې په ورځ په پارلماني چارو کې د سېنټ د قایمه کمېټۍ په غونډه کې د انتخاباتي کمېشن د قانوني چارو مشر محمد ارشد په ډاګه وویل، چې د انتخاباتو په شپه ناوخته د دوی د دفتر چارواکو ته ناڅرګند ټلیفون شوی وو او ریټرننګ آفسرانو ته یې امر کړی وو، چې د نتیجو د لېږدولو سیسټم نور ونه کاروي.
ټریبیون لیکي چې محمد ارشد د سېنټ د کمېټۍ غونډې ته هغه لیک هم وړاندې کړی، چې پکې یې له ایف آی اې څخه د هغه ږغیز پیغام د قانوني پلټنو غوښتنه کړې چې په یو ایس بي کې یې خوندي کړی او ایف آی اې ته یې لېږلی وو.
د انتخاباتو کمېشن له ایف آی اې غوښتي چې په دې برخه کې د نورو پلټنو لپاره دې یو تفصیلي رپوټ هم تیار کړي.
د سېنټ د کمېټۍ غړي سنېټر رحمان ملک هم په غونډه کې په دې اړه خبرې کړې چې څنګه کېدلای شي کمېټۍ د آر ټي ایس یا د نتایجو د انتقال د سیسټم ناکاره کېدو او د انتخاباتو د کمېشن ذمه واریو ته کتنه وکړي. رحمان ملک ویلي:
"ما دغه آډیو یا د ټلیفون ږغ دوې میاشتې مخکې لا د سېنټ په غونډه کې له سنېټرانو سره شریک کړ".
رحمان ملک وایي د انتخاباتو د کمېشن تر قانوني پلټنو وروسته دې نتیجې ته رسېدلی، چې د نتایجو لېږدوونکی سیسټم د انتخاباتو په پر دوه مینټه کم یوولس بجې ورو شوی او د نتیجو د تر لاسه کېدو رفتار یې د ۵۰۰۰۰ نتیجو پر ځای ۵۰ ته را ټیټ شوی دی.
رحمان ملک وایي له پلټنو څرګنده شوې چې د ۴۸۰۰ ریټرننګ آفسرانو سمارټ یا انډرایډ ټلیفونونه نه لرل چې په وسیله یې د نتایجو د انتقال سیسټم کار کاوه، هغه وایي ۴۲۰۰۰ انتخابي عملې مخکې له مخکې لا د انتخاباتو د کمېشن پر خبره له عمل کولو انکار کړی وو.
د انتخاباتو د کمېشن د معلوماتي ټیکالوجۍ د څانګې مشر خضر حیات هم د کمېټۍ غونډې ته د نتایجو د لېږدوونکي سیسټم د استعمال او فعالیت په اړه معلومات ورکړي، خو دا یې منلې چې وایي د انتخاباتو په ورځ له پریزایډنګ او مرستیال پریزایډنګ افسرانو سره په اړیکو ټینګولو او مفاهمت کې له ستونځو سره مخ وو.
