لاس رسیدونکی لینک

Breaking News

چین او پاکستان وایي وخت راغلی چې سیپېک لوېدیځ پاکستان او افغانستان ته وغزول شي


چین او پاکستان وایي دوی په دې لټه او هڅه کې دي چې خپله پراخه اقتصادي منصوبه سیپېک افغانستان ته هم وغزوي. د دغو دواړو هېوادونو چارواکو ویلي، اوس وخت راغلی چې د پاکستان لوېدیځو سیمو او افغانستان ته سیپېک پراخ او په جغرافیوي توګه و غزول شي.

ټاکل شوې چې پر سیپېک 62 اربه ډالره ولګول شي خو بېجنګ تر اوسه په تېرو څلورو کلونو کې پاکستان ته د دې منصوبې لپاره د نرمې قرضې او مخامخ بهرنۍ قرضې په توګه 19 اربه ډالره ورکړې دي، چې د ګوادر او چین تر منځ د ټرانسپورټ نیټورک، بجلیګرونه او ګوادر بندر په و رغول شي.

چین او پاکستان وایي د روان کال په پای کې به په کابل کې د امن او ارامۍ په اړه د درې اړخیزو همکاریو یوه بله غونډه کېږي، چې وایي په دې غونډه کې به په سیپېک کې د افغانستان د ګډولو په اړه هم خبرې کېږي.

په اسلام اباد کې د چین سفیر یاو جینګ وایي، د سیپېک دوه اړخیزه منصوبه باید د مثبتې سیمه ییزې همکارۍ او پیوستون لپاره د یوه بنیاد په توګه وکارول شي:

"د پاکستان دغه اقتصادي پرمختګ په اصل کې د ټولې سیمې د بشپړ اقتصادي پرمختګ لپاره یوه موقع ده".

چارواکو وي.او.اې ته ویلي، کېدای شي چین په پیل کې د افغانستان لپاره د ظرفیت جوړولو په برخه کې د روزنیز پروګرام او د پاکستان له موټروې سړکونو سره د جلال اباد او کندهار د نښلولو وړاندیز وکړي.

د پاکستان د سېنټ د بهرنیو اړیکو د کمېټۍ مشر مشاهد حسېن وایي، وخت راغلی چې سیپېک اوس له پاکستان او چین ور هاخوا ته هم پسې وغزېږي:

"د سیپېک فطري پراختیا باید د افغانستان پر لور وي، ځکه چې افغانستان له پاکستان او چین سره پوله او دغه درېواړه هېوادونه د اقتصاد، کلچر او جغرافیې په لحاظ سره تړلي دي".

مشاهد حسېن وایي، په روانه میاشت کې به په اسلام اباد کې د افغانستان، پاکستان او چین د پوهانو یو درې اړخیز غیرسرکاري کانفرنس هم وشي او په دې کې به دا وڅېړل شي چې څنګه کېدای شي افغانستان په سیپېک کې شامل کړل شي.

چین وایي د سیپېک منصوبې په تېرو څلورو کلونو کې په پاکستان کې 75000 کسانو ته نوکرۍ ورکړل شوې دي او د دې هېواد د اقتصادي ودې اندازه هم په 2017م کال کې له 3 فیصده څخه 5.8 فیصده ته ورسره پورته شوې ده.

XS
SM
MD
LG