د امریکې د بهرنيو چارو وزير مايک پمپیو ویلي هغه ټول استخباراتي رپوټونه چې له نظره يې تېر شوي سعودي وليعد د ژورنالسټ جمال خاشقجي سره نېغ تړاؤ نه لري.
او د امریکې د دفاع وزیر جېم مېټس ویلي امریکا غواړي چې د جمال خاشقجي په وژنه کې ککړ لاس مالوم کړي خو امریکا په منځني ختيځ کې د ثبات په لړ کې د سعودي عرب رول د پامه نه شي غورځولی.
هغه ويلي د وژونکو د مالومولو او نيولو د غوښتنې سره دا حقیقت هم منل پکار دي چې سعودي عرب د امریکا مهم سټراټيجيک همکار دی.
مېټس او پمپيو د امریکا سېنېټ ته د جمال خاشقجي د وژنې په اړوند احوال وړاندې کړی خو په سېنېټ کې د سي ايي ای د مشر په نشتوالي اندېښنه څرګنده کړی شوې ده.
له دې وړاندې داسې رپوټونه خپاره شوي چې سي ايي ای د خاشقجي د پلټنو په لړ کې مالومه کړې چې هغه د سعودي عرب ولیعد شهزاده محمد بن سلمان په امر وژل شوی ؤ.
خو سعودي عرب دغه خبره رد کړې ده.
د امریکې صدر ډانلډ ټرمپ هم ويلي ؤ چې د خاشقجي د وژنې سوال په خپل ځای پاتې دی.
پمپيو ویلي د سعودي عرب سره اړيکې راکمول به د امریکې او اتحاديانو د ملي امنيت په ګټه نه وي.
په امریکا کې مېشت د سعودي عرب ژورنالسټ جمال خاشقجي د اکتوبر په ٢مه نېټه په استنبول کې د سعودي عرب قونصلګرې ته د خپل واده لپاره کاغذونه جوړولو له ورغلی و خو بیا ژوندی نه دی لیدل شوی.
د ترکي او سعودي چارواکو د هغه د مرګ تصدیق کړی دی خو جسد یې نه دی موندل شوی.
