افغان ميډيا وايي په دوحه کې د امریکايي چارواکو او طالبانو ترمنځ د جمعې په ورځ د اوربند او امریکايي پوځ د افغانستان څخه وتلو په سر خبرې شوي دي.
طلوع نيوز د دوحه خبرو ته نزدې سرچينو له قوله ويلي، امریکايي چارواکو منلې چې ځواکونه به يې د افغانستان څخه ووځي.
او د دې ترڅنګ طالبان په دې موافقه شوي چې القاعده او داعش ته به په افغانستان کې ځای نه ورکوي.
سرچینې ويلي امریکايي چارواکو طالبانو ته د اوربند ويلي خو طالبانو ترې د امريکايي ځواکونو د ويستلو ټاکلی نېټه غوښتې ده.
د رپوټ ترمخه د افغانستان د سولې د خبرو دپاره امريکايي استازي زلمي خليلزاد طالبانو ته د افغان حکومت سره د خبرو کولو ويلي خو طالبانو دې خبرې ته ځواب نه دی ويلی.
د زلمي خلیل زاد په مشرۍ د امریکايي پلاوي او طالبانو ترمنځ خبرې اترې د تېر ګل یا دوشنبې په ورځ پېل شوي چرته چې طالبان خپل سیاسي دفتر لري. د پاکستان او قطر سفارتکارانو هم په خبرو کې برخه اخستې ده.
سرچینو واېس اف امریکا ته ویلي دواړو غاړو د څلورو ورځو راهسې په روانو خبرو اترو کې تر ټولو مشکلو دوه ستونزو په سر اتفاق ته د رسېدو په کوششونو کې په ډېرڅه خبرې کړي دي.
په داسې حال کې د دوحه په خبرو کې د پرمختګ خبرونه مخې ته راروان دي، نه خو زلمي خليلزاد او نه طالبانو په دغه اړوند په خپله په رسمي ډول کوم بيان ورکړی دی.
خو په عېن حال کې د افغانستان صدر اشرف غني ویلي د طالبانو سره د سولې ممکنه لوظنامه باید چې د هېواد آئین او قانوني چوکاټ ته احترام ولري.
صدر اشرف غني دغه خبرې د جمعې په ورځ د سوېټرزلېنډ په ډوس ښار کې نړیوالې اقتصادي غونډې ته وکړې.
افغان صدر وویل په افغانستان کې د موجودو خارجي ځواکونو د اینده فېصله باید چې د افغانانو په ملکیت کې مذاکراتو کې وشي.
