د خېبرپښتونخوا په جنوبي ضلع کرک کې نن د شورو، چهارشنبې په سهار د مسافرو ګاډی د بل سره په ټکر شوی چې له امله يې ۱۶ کسان مړه شوي او څلور ژوبل شوي دي.
دا پېښه د کرک په تبي علاقه کې په غټ سړک (انډس هايي وی) رامنځه شوې ده.
ځايي پوليس ويلي د ټکر کېدو سره د مسافرو په ګاډي (هايي يس کوچ) باندې اور لګېدلی او په ګاډي کې ناست کسان د اور له امله سوځېدلي او مړه شوي دي.
د کرک روغتون چارواکو ويلي ورغتون ته د ۱۶ کسانو مړي راوړل شوي چې شپږ پکې ښځي دي.
د چارواکو په وېنا په مړه شوؤ کې د ۱۲ تنو پېژندګلو شوې او د دوه نورو کسانو د پېژندګلو هڅه کيږي خو ويل کيږي دوه مړي داسې دي چې پېژندګلو ګرانه ده ځکه هغه په بشپړ ډول سوځېدلي دي.
د مسافرو ګاډی د ډېره اسماعيل خان نه پېښور ته په لار ؤ او د ډبل کېبن ګاډي سره په ټکر شوی دی.
د کرک کمشنر ميډیا سره په خبرو کې ويلي، د مسافرو په ګاډي اور د سي اېن جي ګېس، ګاز د سلېنډر له امله لګېدلی دی.
هغه ويلي د مړه شوؤ زیاترو مسافرو تعلق د ډېره اسماعيل خان، ټانک او جنوبي وزيرستان سيمو سره دی.
چارواکو په سمدستي ډول د ګاډو د ټکر کېدو علت نه دی ویلی، خو ځايي خلک تور لګوي چې د انډس هايي وی سړک ډېر مات شوی او پېښه هم دې لامله رامنځته شوې ده.
په پاکستان کې زياتره ټرېفکي پېښې د سړکونو د خرابوالي، ډرايورانو د بې پرواهۍ او په ګاډو کې د حساب نه سېوا وزن بار کولو له امله رامنځته کيږي.
د دغو پېښو يو علت د ټرېفک قانون په عمل کې نه راوستل هم ښودلی کيږي.
