د پاکستان وزيراعظم عمران خان وايي، "د امن د نوبل انعام حقدار نه يم" د نوبېل جايزې حقدار هغه څوک دی چې د کشمير شخړه هواره کړي.
په پاکستان کې په سوشل میډيا هغه وخت د عمران خان دپاره د نوبل جايزې غوښتنه پېل شوې چې هغه د هند د نيولي پايلټ د خوشي کولو اعلان کړی ؤ.
نه يواځې په ټولنيزو رسنیو عمران خان ته د نوبل جايزې ورکولو دپاره ويل کېده بلکې د پاکستان د اطلاعاتو وزیر فواد چودري هم د قامي اسمبلۍ په سيکرټريټ کې يو قرارداد جمع کړی ؤ.
فواد چودري ويلي عمران خان د پاکستان او هند ترمنځ په کړکېچ کمولو کې رول ترسره کړی ځکه هغه ته د سولې نوبېل جايزه ورکړی شي.
عمران خان نن د ګل/دوشنبې په ورځ په ټويټر ويلي،
"زه د امن د نوبل انعام حقدار نه يم. د نوبل جايزې حقدار به هغه څوک وي چې د کشمير د اولس د خواهشاتو په رڼا کې د کشمير شخړه هواره کړي او په برصغير کې د سولې او انساني پرمختګ لاره هواره کړي".
تېره اوونۍ پاکستان ادعا کړې د هند دوه جنګي الوتکې يې نسکورې کړي او يو هندي پايلټ يې نيولی دی.
وزيراعظم عمران خان د پايلټ د نيولو په دوېمه ورځ د پارلیمان شريکې غونډې ته په وېنا کې د هغه د خوشي کولو اعلان کړی ؤ.
د سولې لپاره د نوبل جايزه ګټونکې ملالې یوسفزۍ د پاکستان او هندوستان په مشرانو غږ کړی ؤ چې د خبرو اترو د لارې دې تاو تریخوالی ختم کړي.
هغې په ټويټر ويلي ؤ،
"زه د پاکستان وزبراعظم عمران خان او د هندوستان وزیراعظم نرېندرا مودي ته وایم چې په دې مشکل وخت کې د ریښتونو مشرانو په توګه کینئ، لاسونه سره ورکړئ، او د اوږدې مودې راهسې روانې د کشمیرد لانجې حل د خبرو اترو د لارې را اوباسئ".
ملاله يوسفزۍ په کال ۲۰۱۴م کې د نوبل جايزه ګټلې وه.