د افغانستان د صدر اشرف غني وياند د هالېنډ د يوې ژورنالسټې هغه ادعا په سختۍ سره رد کړې چې د طالبانو مشر ملا عمر په زابل کې د امریکايي ځواکونو د اډې سره نزدې اوسېدو.
ژورنالسټې په خپل کتاب " د دښمن لټون" کې ويلي چې د طالبانو مشر د څو کلونو پورې د امریکا د يوې پوځي اډې سره نزدې پټ اوسېدو.
د افغان ولسمشر وياند هارون چخانسوري په ټويټر د هالېنډ د ژورنالسټې ادعا ته په غبرګون کې ويلي،
"مونږ دغه ادعا په کلکه ردؤ او ګڼو چې دا د طالبانو او د هغوی بهرنیو ملاتړو ته د هویت ورکولو یوه هڅه ده، مونږ پوره شواهد لرو او هغه ښايي چې هغه (ملا عمر) په پاکستان کې اوسېدو او هلته مړ دی".
د فرانس د خبري ادارې ترمخه د هالېنډ ژورنالسټې بيتي ډام په خپل کتاب کې ويلي د دغه کتاب دپاره يې په پينځه کاله موده کې مواد راټول کړي او هغه د ملا عمر د ساتونکي جبار عمري سره مرکه هم کړې ده.
هغې ويلي د طالبانو د واک ختمېدو وروسته عمري ملا عمر پټ ساتلی ؤ او حفاظت يې ورله کولو.
په ۲۰۰۱م کې د ۹/۱۱ د پېښو د ترهګر بریدونو وروسته امریکا په افغانستان کې د طالبانو حکومت نسکور کړی او د ملا عمر په سر يې د يو کروړ روپو انعام اعلان کړی ؤ.
ژورنالسټې په خپل کتاب کې ادعا کړې چې ملا عمر په زابل کې په يو وړوکي کور کې پټ ؤ کوم چې د امریکا د پوځي اډې سره نزدې وو.
هغې دا هم ويلي امریکايي پوځيان دوه ځله دغه کور ته نزدې ورغلي خو د دغه کوټې چې ملا عمر پکې ؤ د هغې د تلاشۍ يې نه وه کړې او تېر شوي وو.
طالبانو په ۲۰۱۵م کال کې د ملا عمر د مړينې پخلی کړی ؤ.
خو د ۲۰۱۵م د جولايۍ په مياشت کې د ملا عمر د مړينې د خبر مخې ته راتلو په مهال د اشرف غني د دفتر لخوا په جاري شوي بيان کې وئيل شوي ؤ چې د طالبانو مشر په کال ۲۰۱۳م کې ساه ورکړې وه .
د اشرف غني د دفتر څخه په جاري شوي بيان کې وئيل شوي ؤ "د افغانستان اسلامي دولت د بااعتماده معلوماتو په بنیاد، ددې خبرې تصدیق کوي چې د طالبانو مشر د کال ٢٠١٣ د اپریل په میاشت کې پاکستان کې مړ شوی دی".
