د پاکستان تحریک انصاف د حکومت په مرکزي کابينه کې يو بل لانجمن پخوانی پوځي افسر (ر) بريګيډيئراعجاز شاه شامل کړی شوی او له دې وړاندې هم د پخواني پوځي امر د وخت ډېری وزيران د عمران خان په کابينه کې شامل کړی شوي دي.
د اطلاعاتو مرکزي وزير فواد چودري په ټویټر د نوي وزير بریګيډيئر (ر) اعجاز شاه په کابينه د مرکزي وزیر جوړېدو پخلی کړی چې هغه به د پارلیماني چارو مرکزي وزير وي.
خو پاکستان پيپلز ګوند د پي ټي ايي په حکومت نیوکې کړي چې د پخواني پوځي آمر پروېز مشرف نزدې تن يې په کابينه کې شامل کړو.
د پيپلز ګوند د اطلاعاتو سېکتر نفيسه شاه ويلي پخوانۍ وژل شوې وزيراعظمې بېنظير بټو په خپل ايمېل کې د اعجاز شاه نوم اخيستی او ويلي يې ؤ که هغه ووژل شوه نو د اعجاز شاه څخه دې پوښتنې وکړی شي.
پيپلز ګوند په اعجاز شاه دا تورونه هم لګولي چې هغه د مشرف په وخت کې سياسي جوړ جاړي کول.
ژورنالسټ او څيړونکي مرتضی سولنګي په ټويټر ويلي،"د بريګيډيئر (ر) اعجاز شاه نوم د بېنظير بټو د وژنې په پېښه کې اخيستل کيږي. او دا هغه تن دی چې د ژورنالسټ ډينيل پرل په وژنه کې ککړ د (القاعده) عمرشېخ يې د ځان سره ساتلی ؤ او اوس په مرکزي کابينه کې شامل کړی شو. د ترهګرۍ ضد قامي تګلاره ښخه کړی شوه".
د وال سټريټ جنرال ژورنالسټ ډينيل پرل په کال ۲۰۰۲م کې په کراچۍ تښتول شوی او وژل شوی ؤ، خالدعمر شېخ د هغه نه د سرغوڅولو زمه واري منلي وو.
اعجاز شاه د پخواني پوځي آمر پروېز د مارشل لا لګولو په وخت په پنجاب صوبه کې د استخباراتي ادارې (ايي اېس ايي) مشر ؤ بيا د انټيلجينس بيور مشر کړی شوی او د مشرف نزدې تن ؤ.
هغه د کال ۲۰۱۸م په انتخاباتو کې د پنجاب د نانکانه سيمې څخه د تحریک انصاف ګوند په ټکټ د قامي اسمبلۍ انتخابات ګټلي وو.
د عمران خان په کابينه کې له دې وړاندې هم د پروېز مشرف د کابينې ګڼ کسان وزیران جوړ کړی شوي دي چې پکې د قانون وزير فروغ نسيم، شېخ رشيد، زبېده جلال، فواد چودري، مخدوم خسرو بختیار، ډاکټر عشرت حسېن، عبدالرزاق داؤ او د اېم کيو اېم خالد مقبول صديقي شامل دي.
يوه میاشت وړاندې پروېز مشرف په خپله ويلي ؤ د عمران خان په کابينه کې نيم کسان د هغه خپل خلک دي.
