د پاکستان وزیراعظم عمران خان د ایران د صدر حسن روحاني سره په تهران کې لیدلي او دواړو مشرانو په دوه اړخيزه او سیمه ييزه چارو خبرې اترې کړي دي.
د پاکستان د دولتي رسنیو ترمخه د پاکستان وزیراعظم به د ايران مذهبي مشر ايت الله خامنه يې، سره هم ويني او د ايران د کاروباريانو سره به هم ليده کاته کوي.
د پاکستان وزيراعظم سره د پلاوي د تهران سفر په داسې حال کې کړی چې تېره اوونۍ په ۱۸م اپرېل د کراچۍ او ګوادر ترمنځ د مسافرو په بسونو ډزو کې ۱۴ تنه وژل شوي وو.
د پاکستان د بهرنيو چارو وزیر شاه محمود قرېشي دوه ورځې وړاندې د ډزو په پېښو کې د وژل شوؤ په اړوند ويلي ؤ په وژل شوؤ کسانو کې ۱۰ د سمندري ځواک سرتيري، درې د هوايي ځواک او يو د ساحلي ځواک سرتېری ؤ.
قرېشي ویلي ؤ دا بريد د بي ار ای په نوم د بلوڅ بېلتون غوښتونکو د اتحاد غړو کړی ؤ.
هغه ويلي دا بريدګر د ايران څخه د پاکستان لوري ته راغلي او د پاکستان په امنيتي سرتېرو يې برید کړی ؤ او پاکستان په دغه اړوند تهران خبر کړی دی.
د ايران د بهرنيو چارو وزیر جواد ظريف د دغه بريد غندنه کړې وه.
د پاکستان سره په پوله د ايران سېستان بلوچستان صوبه کې وخت په وخت ايراني چارواکي وايي د پاکستان د لوري نه د جېش العدل نومې ډلې وسله وال اوړي او په ايراني ځواکونو بريدونه کوي.
د روان کال فرورۍ په مياشت کې د ايران په انقلابي ځواک باندې يو ځانمرګي بريد کې ۲۷ سرتيري وژل شوي او ۱۳ ژوبل شوي وو.
جېش العدل د دغه بريد زمه واري منلې وه.
د ايران د انقلابي ځواک مشر د پاکستان نه غوښتي ؤ چې د جېش العدل پرضد ګامونه پورته کړي له دې وړاندې چې تهران په خپله خپل بدل واخلي.
ایران تور لګوي پاکستان د دغو وسله والو ډلو مخه نه نيسي څوک چې په ايراني ځواکونو بريدونه کوي.
