د پاکستان د تعليم مرکزي وزير ويلي په ملک کې ټولې دينې مدرسې او پوهنتونونه به ځان د تعليم د وزارت سره درج کوي.
د تعليم مرکزي وزير شفقت محمود ويلي، د ديني مدرسو درج کولو دپاره به وزارت علاقايي دفترې پرانيزي او د ټولو مدرسو ريکارډ به راټولوي.
د دولتي ريډيو ترمخه نوموړي وزير ويلي کومې مدرسې چې خپل اندراج نه کوي هغه به تړلی شي.
شفقت محمود دا خبره په داسې حال کې کړې چې د پاکستان پوځي وياند مېجر جنرل اصف غفور د تېرې میاشتې په خپل وروستي خبري کانفرنس کې ويلي ؤ په ملک کې ۳۰ زره مدرسې جوړې دي او په دوي کې د ۱۰۰ نه کمې داسې دي چرته چې تندروۍ پله د راوستو زدکړې ورکولی شي.
هغه ويلي ؤ پوځ هڅه کوي چې دا مدرسې قومي چوکاټ ته راولي.
د هندي کشمير په پلوامه کې په هندي ځواکونو د برید وروسته د پاکستان مرکزي حکومت د لاقانونه ګرځول شوؤ ډلو جېش محمد او جماعت الدعوه د مدرسو په خپله ولقه کې اخیستو ويلي ؤ.
د راپورونو ترمخه حخکومت په پنجاب صوبه کې ۱۶۰ مدرسې او سيند صوبه کې ۱۸ مدرسې د اوقافو محکمې ته سپارلې وې.
وفاق المدارس العربيه پاکستان د مدرسو په حکومتي ولقه کې اخیستل غندلي او ويلي يې ؤ حکومت د نړيوال فشار له امله د مدرسو پرضد ګامونه پورته کوي.
په پاکستان کې وخت په وخت د ديني مدرسو په نصاب، دوي ته د پېسو په ورکړه او رجسټرېشن باندې سوالونه راپورته کيږي او د ترهګرۍ پرضد جوړه کړی شوې قامي تګلاره کې هم د مدرسو د رجسټرېشن ويل شوي وو.
خو راپورونه وايي د مدرسو په اړوند تراوسه پورې هيڅ ډول ختمي پرېکړې نه دي شوي.
د وفاق المدارس مشرانو د مارچ په مياشت کې ويلي ؤ چې د ملک په مدرسو کې ۳۵ لاکه زده کوونکي زدکړې کوي.