لاس رسیدونکی لینک

Breaking News

امریکا: د اسامه د زوی حمزه بن لادن یو پټنځای کېدای شي پاکستان وي


واشنګټن ــــ د امریکې استخباراتي ادارې ایف بي ای د اسامه بن لادن د زوی حمزه بن لادن نوم د هغه د ترهګرۍ اړوند فعالیتونو په تړاو د خپلو پلټنو په لیسټ کې شامل کړی دی.

30 کلن حمزه بن لادن د سعودي عربستان په جده ښار کې زېږېدلی او په عربي ژبه خبرې کوي. ویل کېږي چې هغه د یوولسم سپټمبر تر پېښې وروسته له خپل پلار سره په افغانستان کې وو او په پاکستان کې یې هم وخت تېر کړی. ایف بي ای لیکلي:

"هغه له پاکستان، افغانستان، شام او ایران سره اړیکي لري او کېدای شي چې له همدغو هېوادونو په یوه کې موجود وي".

د امریکې د بهرنیو چارو وزارت دوې میاشتې مخکې په مارچ کې اعلان کړی وو چې که څوک د حمزه بن لادن په اړه معلومات ورکړي چې هغه چېرې اوسېږي، نو 1 میلین امریکایي ډلره انعام به ورکړي.

د حمزه بن لادن پر سر د امریکې تر انعام اعلانولو یوه ورځ مخکې د ملګرو ملتونو امنیتي شورا د هغه نوم په تور لیسټ کې شامل کړ او پر دویمه ورځ یې سعودي عربستان د هغه شهریت (تابعیت) هم ختم کړ.

ایف بي ای د خپلو "نورو معلوماتو د پلټنې لیسټ" (ایس ایم آی ایل) ته د اسامه بن لادن د زوی نوم ځکه اچولی چې وایي غواړي هغه په القاعده ډله کې د خپل غړیتوب په اړه وپوښتي ځکه چې وایي د ده دا ښکاره اعلان د امریکې د امنیت لپاره خطر دی.

حمزه بن لادن.
حمزه بن لادن.

امریکې په 2017م کال کې حمزه بن لادن نړیوال ترهګر اعلان کړ او وېره لري چې کېدای شي هغه په القاعده ډله کې د خپل پلار ځایناستی شي او د هغه د وژنې په بدل کې امریکې ته خطر پېښ کړي.

ایف بي آی وايي، پلټونکي باور لري چې حمزه بن لادن د القاعدې د لوړپوړي مشر عبدالله احمد عبدالله- چې په ابو محمد المصري مشهور دی- له لور سره واده کړی دی. ابو المصري د د 1998م کال د اګست پر 7مه په تنزانیا او کېنیا کې د امریکې پر سفارتونو په بریدونو کې په لاس لرلو تورن دی.

ایف بي آی دغه اعلان د انګرېزي په ګډون په عربي، اردو، پښتو، دري او فارسي ژبو هم خپور کړی او د دغو هېوادونو له خلکو یې غوښتي چې که د حمزه بن لادن په اړه معلومات لري، د ایف بي آی سیمه ییزې څانګې یا د امریکې سفارت او کونسلګرۍ ته دې خبر ورکړي.

XS
SM
MD
LG