واشنګټن: ایران وايي، دوی به د ۲۰۱۵ کال له اټومي تړون څخه چې امریکا ورڅخه تېر کال وتلې ده ووځي.
دې خبرې د امریکا د ولسمشر مرستیال مایک پېنس سخت ګواښونو راپارولي.
"ایران باید د امریکا له زغم څخه ناوړه کار وا نه خلي. مونږ د ښو هیله لرو خو امریکا او زمونږ پوځ په سیمه کې زمونږ د خلکو او وګړو د ګټو ژغورلو لپاره چمتو دي. مونږ به د ایران د ناوړه اغیز په وړاندې خپل مخالفت ته دوام ورکړو. مونږ به د ایران په اقتصاد باندې فشار راوړو او د ولسمشر ډانلډ ټرمپ د واک لاندې به امریکا هېڅکله ایران دې ته پرې نږدي چې اټومي وسلې ترلاسه کړي."
د امریکا د ملي امنیت سلاکار جان بولټن تهران ته ورته ګواښونه کړي.
"مونږ به د ایران پر رژیم تر هغو پورې فشارونه زیاتوو تر څو دوی خپل د اټومي وسلو پروګرام بند کړي، په منځني ختیځ کې له خپلو ورنکارو کارونو او په نړۍ کې د ترهګرۍ له ملاتړ څخه لاس واخلي."
د ایران یو جګ پوړي پوځي چارواکي د ګل یا دوشنبې په ورځ وویل، ایران له هېڅ کوم هېواد سره جګړه نه غواړي خو ایران د اټومي تړون له نورو غاړو څخه غواړي چې په ایران باندې د امریکا لخوا لګول شویو اقتصادي بندیزونو ته د حل یوه لاره ومومي.
پدغو بندیزونو کې امریکا د ایران د تېلو په صادراتو باندې هم بندیزونه لګولي د کوم له امله چې د ایران اقتصاد له ډېرو ستونزو سره مخ دی.
اروپايي ټولنې او روسیې د ایران د یورانیمو د غني کولو په اړه اندېښه ښودلې ده خو روسیې په ورته وخت کې امریکا هم ګرم ګڼلې چې تېر کال د ایران له اټومي تړون څخه ووتله.
