ملګرو ملتونو په پاکستان او هند دواړو غږ کړی چې د کشمیر په معامله دې د زغم نه کار واخلي. ملګرو ملتونو د کشمیر په تازه وضعيت اندېښنه څرګنده کړې ده.
د ملګرو ملتونو د سيکرټري جنرل انتونيو ګېټرس دغه بيان په داسې حال کې ورکړی چې هند د خپلې ولقې لاندې کشمیر ځانګړی حيثيت ختم کړی او د یو صدارتي امر لاندې ترسره شوې پرېکړې وروسته اوس کشمیر يو رياست نه دی پاتې بلکې اوس به په بشپړ دول د هند علاقه ګڼل کیږي.
پاکستان د هند دغه پرېکړه غندلې او ویلي يې دي د هند د کشمیر په اړوند د پرېکړې پرضد به د ملګرو ملتونو امنیتي شورا او د اسلامي هېوادونو سازمان (او ائي سي) سره رابطه کوي.
هند د دغه پرېکړې وروسته د حالاتو د جاج اخیستو دپاره د پاکستان پوځ قمر جاوېد باجوه نن د نهې، سه شنبې په ورځ د کور کمانډرانو يوه مهمه غونډه او د پارلیمان شريکه غونډه هم رابلل شوې ده.
د ملګرو ملتونو ویاند سټيفن ډوجيرک د ګل، دوشنبې په ورځ ویلي نړیواله اداره د هندي کشمير په اړوند د هند په پرېکړه خبر ده او زياته کړې يې ده د ملګرو ملتونو څارونکو خبر ورکړی چې په لاين اف کنټرول پوځي هلې ځلې سېوا کړی شوي دي.
