د افغانستان ولسمشر اشرف غني وايي " که طالبان سوله غواړي مونږ د یوې شېبې دپاره هم د جګړې دوام نه غواړو، او دلته يو ځل بيا په صراحت سره اووايم چې د ټولو قتلونو او خونرېزيو ګناه د هغه چا په غاړه چې سوله او اوربند نه مني".
اشرف غني د سولې د نړيوالې ورځې په مناسبت خپل پېغام کې ويلي، د افغانستان اسلامي جمهوریت بيا بيا د اوربند غوښتنه کړې ده او واقعي سولې ته د رسېدو دپاره پکار ده چې اوربند وشي او د وینې توېدل بند شي.
نوموړی وايي "جګړه د حل لاره نه ده سوله الهي امر دی".
په خپل پېغام کې افغان ولسمشر وايي، د اسلامي نړۍ د ټولو فتوی ټولو معتبرو مرکزونو او ټولو منل شوؤ ديني مراجع په افغانستان کې جګړه حرامه بللې ده.
افغان ولسمشر دغه خبرې په داسې حال کې کړي چې د امریکا او طالبانو ترمنځ د سولې خبرې امریکا ودرولي دي.
افغان چارواکي وايي امکان لري چې د افغانستان د سولې په اړوند د امریکا او طالبانو ترمنځ خبرې بيان روانې شي.
اشرف غني پرون ماښام له خېبر پښتونخوا، کوټې او بهرنیو هېوادونو څخه کابل ته د افغان امن نړیوال کنفرانس ته ورغلو پوهانو او سیاستوالو سره ليدلي دي.
د عوامي نيشنل ګوند مشر اسفندیار ولي خان ښاغلي غني ته د امن نړیوال د دوه ورځني کنفرانس او د یاد کنفرانس په بېلابېلو کمېټو کې د جنګ د لاملونو، د هغه د له منځه وړلو او د سولې د راوستو په اړه د شویو بحثونو په هکله معلومات ورکړل.
ارګ د يادې ناستې په اړوند ويلي په دغه موقع اسفندیار ولي خان په ټينګار سره وویل، د سولې مذاکرات باید د افغان دولت په مالکیت ترسره شي.
ولمشر غني مېلمنو ته د ښه راغلاست پرمهال وویل، "جنګ حدود نه لري، ځکه چې تحمیلي جنګ د ډیورنډ دواړو غاړو ته ولسونه متضرر او د ښځو او ماشومانو په ګډون مشران قرباني شوي او لا هم هره ورځ قرباني کېږو".
هغه زیاته کړه، "روان جنګ د ثبات، هوساینې او انکشاف اصلي مانع دی، نو د ډيورنډ کرښې دواړو غاړو ته پراته ولسونه او خلک باید د باعزته او تلپاتې سولې لپاره دغه جنګ او بحران ته د پای ټکی کېږدي".
اشرف غني وویل، "اسلام اباد ته په وروستي سفر کې یې پاکستاني چارواکو ته ویلي که پاکستان غواړي چې له فقر، د انرژۍ له کموت او نورو ناخوالو څخه ځانونه وژغوري، نو باید افغانستان ته د دوستۍ صادقانه لاس ورکړي او په دې برخه کې خپلې ژمنې په عمل بدلې کړي".