د پاکستان د بهرنیو چارو وزير شاه محمود قرېشي ويلي، نن سهار چې په عراق کې په امریکايي پوځي اډو کوم بريدونه شوي د هغې جاج اخلي او پاکستان نه غواړي چې سيمه په نوې جګړه کې ښکېل شي.
شاه محمود قرېشي دا بيان په داسې حال کې ورکړی چې ايران په عراق کې د امریکا په پوځي اډو بريدونه کړي دي.
د امریکا صدر ډانلډ ټرمپ ويلي په بريدونو کې هر څه سم دي او ايران وايي په خپله دفاع کې يې بريدونه کړي دي.
قرېشي د ايران د بهرنيو چارو وزير جواد ظريف دې بيان ته سنجيده ويلي چې ايران جنګ نه غواړي، او زياته کړې يې ده امریکا ته هم احتياط پکار دی.
هغه ويلي د بهرنيو چارو د وزیرانو سره په رابطه کې دی دوی غواړي چې په سیمه کې اړی ګړی سېوا نه شي ځکه چې دا سيمه د جنګ توان نه لري.
قرېشي ويلي پاکستان امن او د خبرو د لارې د مسلو هواری غواړي او بايد ملګري ملتونه او نړيواله ورورولي د حالاتو په قابو کولو کې رول ادا کړي.
امریکې د جمعې په ورځ په بغداد کې د عراق د قدس ځواک مهم جنرل قاسم سليماني په هوايي بريد کې وژلی ؤ.
د سليماني د وژنې وروسته د امریکې د بهرنیو چارو وزير مايک پمپيو د پاکستان د پوځ د مشر قمر جاوېد باجوه سره په ټيليفون خبرې کړې وې.
ايران ويلي ؤ د سليماني د وژنې بدل به اخلي او امریکا ويلي ؤ که ايران کوم بريد وکړو سخت ځواب به ورته ورکړي.
پاکستان کې په عېن حال کې خپلو ملکي وګړو ته د عراق د سفر په پلان جوړولو کې د احتياط اخيستو ويلي دي.
د پاکستان د بهرنيو چارو وزارت په عراق کې موجود پاکستانيانو باندې غږ کړی چې په بغداد کې د پاکستانۍ سفارتخانې سره په رابطه کې اوسي.
