د جنوبي وزيرستان نه د قامي اسمبلۍ په منتخب غړي او د پښتون ژغورنې غورځنګ (پي ټي اېم) د مخکښ مشر علي وزير پرضد د نااهلۍ خواست د اسلام اباد هايکورټ رد کړی دی.
د پي ټي اېم وکيل عبدالرحيم وزیر په وېنا د اسلام اباد هايکورټ جسټس اطهرمن الله ويلي دغه خواست د اورېدنې قابل نه دی.
درې ورځې وړاندې د عبدالولي نومې تن چې د پخوانۍ قبايلي سيمې سره تعلق لرونکی زده کوونکی دی د وکيل خرم شهزاد چغتايي د لارې اسلام اباد هايکورټ ته د علي وزير او پي ټي اېم پرضد خواست کړی ؤ.
وزير وايي جسټس اطهرمن الله وويل که چاته په چا اعتراض وي د هغې طريقه موجوده ده.
په خواست کې ويل شوي ؤ چې د قامي اسمبلۍ غړی علي وزير او پي ټي اېم د قامي ګټو پرضد هلوځلو کې ککړ دي.
د جنوبي وزيرستان نه د قامي اسمبلۍ په منتخب غړي او د پي ټي اېم په مخکښ مشر علي وزير او د پي ټي اېم په يو شمېر نورو غړو له دې وړاندې هم د رياست او رياستي ادارو پرضد د وېناګانو کولو او نعرو وهلو مقدمې درج دي.
علي وزير د خړکمر په پېښه کې جېل ته هم لېږل شوی ؤ.
د پاکستان پوځ او حکومت هم په پي ټي اېم د بهر هېوادونو څخه د پېسو اخیستو تورونه پورې کړي خو پي ټي اېم وايي د غورځنګ پرضد د لګول شوؤ تورونو ثبوتونه دې مخې ته راوړل شي.
پي ټي اېم وايي د پاکستان د ائين او قانون لاندې د پښتنو د حقونو دپاره پرامنه مبارزه کوي.