واشنګټن ــــ د پاکستان وزیراعظم عمران خان له خلکو غوښتي چې د کرونا وایرس د مخنیوي په خاطر دا ځل کوچنی اختر په روایتي او دودیز ډول نه بلکې په داسې توګه ولمانځي چې د دې وایرس د خپرېدو سبب نه شي.
د پاکستان د میاشتې لیدو سرکاري کمېټۍ د شنبې- خالي په شپه ناوخته د هېواد له ټولو صوبو د تر لاسه کړو شواهدو له ارزولو وروسته د میاشتې لیدو اعلان وکړ او ویې ویل چې د اتوار- یکشنبې په ورځ به د کوچني اختر لومړۍ ورځ وي.
وزیراعظم عمران خان پر خپله ټویټر پاڼه د شپې ناوخته له خلکو وغوښتل چې د کرونا وایرس د مخنیوي ځانګړو تدابیرو ته دې په سنجیدګۍ سره پام وکړي:
(دا وبا زموږ په منځ کې ده نو د اختر د لمانځه په ګډون د اختر په ټولو رخصتیو کې ټولنیز واټن او له یو بل لرېوالي ته ځانګړې توګه وکړئ)
د رویت هلال کمېټۍ مشر مفتي منیب الرحمن هم د میاشتې لیدو د اعلان پر وخت پر خلکو ږغ وکړ، چې د اختر په ورځو کې د کرونا وایرس د مخنیوي پر تدابیرو عمل وکړي او هڅه دې وکړي چې له خلکو سره په غېږ او لاس د اختر مبارکۍ څخه ډډه وکړي.