د ايران د پلازمینې تهران نه شمال اړخ ته په غرونو کې د زورورې واورې ورښت 12 غره ته ختونکي وژلي دي، او په خليج فارس کې يو سمندري جهاز ګېر شوی او د عملې اووه تنه يې بې درکه شوي دي.
په ایران کې د تيرو څو ورځو راهسې د زورورې واورې د ورښت سره تيزې هواګانې چلېدې، سړکونه بند شوي او د ګاډو تګ راتګ یې اغېزمن کړی ؤ.
غرونو ته د ختونکو د فېډرېشن مشر رضا زایري ويلي، د اتوار په ورځ د دوه پاتې غره ته ختونکو مړي ترلاسه شوي چې شمېره ورسره 12 ته رسېدلې ده.
هغه ويلي په واورو کې د مړه شوؤ 12 کسانو دپاره روان عمليات سر ته رسېدلې دي.
تهران د البرز غرونو په هغه لړۍ کې راځي چرته چې يو شمېر د سکي ريزرټس او غرونو ته د ختلو دپاره مشهور ځايونه دي.
د رويټرز ترمخه ايراني چارواکو ویلي د جمعې په ورځ د ايران د سمندري جهاز د بې درکه شوې عملې لټون روان دی، چې پکې شپږ ايراني او يو هندي شامل دی.
د ايران د مېري ټايم مرستيال اسماعيل مکي زاده ويلي د دغو کسانو د لټون دپاره اووه ډلې د لټون په عملياتو بوخت دي، خو د موسم له امله ممکن نه ده چې دغه عملیات روان وساتل شي.
هغه ویلي په دغه لړ کې يې د متحده عرب اماراتو، عمان او پاکستان سمندري مرکزونه هم خبر کړي دي.
