لاس رسیدونکی لینک

Breaking News

ملګري ملتونه: درانه پورونه کرونا اغېزمن کړي غریب هېوادونه نور په غریبۍ کې ساتي


واشنګټن ـــ د ملګرو ملتونو پرمختیایي ادارې یو این ډي پي په یوه تازه څېړنه کې ویلي، که له پرمختلونکو هېوادونو سره مرسته ونه شي د کرونا وایرس له اغېزه به په ګرانه را وځي ځکه چې وایي د بهرنیو پورونو له کبله هغوی نور هم بېوزله کېږي.

دا څېړنه د پیسو د نړیوالې ادارې او نړیوال بېنک تر غونډې یوه اوونۍ مخکې خپره شوې، چې پکې ویل شوي 120 د ټیټې او منځنۍ کچې د آمدن هېوادونه به سږ کال تر یو کرب ډالرو زیات پورونه پرې کوي.

د دې څېړنې له مخې په دغو کې 72 هغه کمزوري هېوادونه دي چې وایي د دغو یو کرب ډالرو د نیمی برخې د پرې کولو ذمه واري ور له غاړې ده.

د ملګرو ملتونو د پرمختیایي ادارې مشر ایچم سټاینر وایي، دغه 72 هېوادونه د خودمختارۍ او اقتصاد له چېلنجونو سره مخ دي چې وایي دا به د دغو هېوادونو د خلکو د ښېګړې په برخه کې ټولنیز-اقتصادي لګښتونه زیات کړي.

ښاغلی ایچم سټاینر وایي، د دې لپاره په بیړنۍ توګه یوې نوې تګلارې ته اړتیا ده چې د ټیټې او منځنۍ کچې آمدن لرونکو هېوادونو سره د هغوی د پورونو په پرې کولو کې مرسته وکړي:

"دا کار به د راتلونکو کلونو لپاره د غربت او موسمي بدلون په برخه کې د مهمې سرمایه کارۍ مخه ونیسي، هغه سرمایه کاري چې موږ یې له یو شمېر شتمنو هېوادونو سره وینو. د ولسي پورونو ورکړه په پرمختلونکو هېوادونو کې د سرمایه کارۍ ګنجایش پیدا کوي".

د یو این ډي پي مشر وایي ډېر پرمختللي او شتمن هېوادونو په دې تمه دي چې سږ کال به پکې کورونا وایرس ختم شي، خو وایي د غریبو هېوادونو په اړه داسې نه شي ویل کېدای.

وایي دغه هېوادونو له زیاتېدونکې غریبۍ سره مخ دي ځکه چې وایي کورونا وایرس په دوامداره توګه د دغو ټولنو فزیکي او اقتصادي روغتیا ځپي او زیان ور اړوي.

ایچم سټاینر وایي یو شمېر شتمن هېوادونو د کورونا وایرس د مخنیوي او د خپلو اقتصادونو د پرمختګ لپاره پر مرسته کوونکو پېکیجونو پیسې لګوي، وایي د غریبو هېوادونو لپاره هم دې ته ورته سرمایه کارۍ ته اړتیا ده.

د ملګرو ملتونو پرمختیایي اداره راتلونکې اوونۍ د نړیوال بېنک او د پیسو د نړیوالې ادارې ای ایم ایف په غونډه کې له برخه اخیستونکو غواړي، له هغو هېوادونو پر اقتصادي مرستو دې اتفاق وکړي چې تر زیاتو پورونو لاندې دي.

XS
SM
MD
LG