لاس رسیدونکی لینک

Breaking News

پاکستان د سرکاري او غېر سرکاري ملازمينو دپاره د کرونا ويکسين لازمي کړي


په پاکستان کې د کرونا وبا دپاره جوړ قومي عملياتي مرکز (نيشنل کمانډ اېنډ اپرېشن سنټر(اېن سي او سي) په ملک کې د سرکاري او غېر سرکاري کار کوونکو دپاره د کرونا ويکسين لګول لازمي کړي دي.

د شورو/چهارشنبې په ورځ (10 جون) د اېن سي او سي په غونډه کې د کرونا وبا سره اړونده بندېزونو کې بدلون شوی او ځينې نوې پرېکړې شوي دي.

د منصوبه بندۍ وزير اسد عمر چې د اېن سي او سي مشري هم کوي په مشرۍ غونډه کې پرېکړه شوې چې ټول سرکاري ملازمين به د روانې مياشتې جون پورې ويکسين لګوي.

له دې وړاندې د سيند صوبې وزیراعلا مراد علي شاه ويلي وو که کوم سرکاري نوکر ويکسين نه لګوي د جولايي د میاشتې تنخا به ورته نه ورکوي.

په ملک کې د سرکاري او غېر سرکاري ملازمينو دپاره ويکسین په داسې حال کې لازمې کړی شوي دي، چې اسد عمر پرون په ټويټر ويلي وو، نن به د ويکسينو لګوونکو شمېره يو کروړ ته ورسيږي.

د اېن سي او سي په غونډه کې پرېکړه شوې چې د راتلونکې جمعې د ورځې نه به په ټول ملک کې د کرونا ويکسينو مرکزونه سهار د اته بجو څخه د شپې د لسو بجو پورې پرانستي وي او د اتوار په ورځ به رخصتي وي.

دغه رنګ ويل شوي د جمعې نه د 18 کالو نه د زیات عمر کسان کولی شي چې ويکسين ولګوي.

ویل شوي په اوونۍ کې د دوه ورځو دپاره د کاروبارونو بندېز به اوس يوه ورځ وي او دغه ورځ دې صوبې په خپله وټاکي چې په کومه ورځ کاروبار بندوي.

په هر ډول مېلو، دستورو، مزارونو او سنېماګانو د بندېز فېصله په ځای ساتل شوې او په دفترونو کې د 100 فيصده حاضرۍ ويل شوي دي.

ويل شوي د صوبو ترمنځ عام ټرانسپورټ به په اوونۍ کې دوه ورځې بند وي او په ګاډو او اورګاډو (ېل ګاډو) کې به د 50 نه تر 70 فيصده پورې د سورولو اجازت وي.

ماسک اچول ضروري ګرځول شوي دي.

اېن سي او سي دا پرېکړې په داسې حال کې کړي چې په تير شوا روز کې په ملک کې د کرونا څخه نور 76 کسان مړه شوي دي.

د سرکاري شمېرو ترمخه په ملک کې د کرونا څخه تراوسه پورې ټول 21زره 529 کسان مړه شوي دي.

د ویکسينو په اړه د ورکړل شوو شمېرو ترمخه تراوسه پورې په ملک کې 25لکه 40زره 238 کسانو ته پوره ويکسين او 47لکه 41زره 579 کسانو ته نيم ويکسين لګول شوي دي.

XS
SM
MD
LG