لاس رسیدونکی لینک

Breaking News

پاکستان کې د کرونا د پېښو سېوا کېدو سره بندېزونه لګول شوي


په پاکستان کې د کرونا وبا د څار او انتظام دپاره جوړې کمېټۍ (اېن سي او سي) د کرونا وایرس د پېښو زياتېدو وروسته په بندو ځايونو کې په دستورو راجوړولو بندېزونه لګولي او سکولونو ته د تلونکو ماشومانو دپاره يې نوې لارښوونه کړې ده.

اېن سي او سي دغه اعلان په داسې حال کې کړی چې په تېر شوا روز کې په ملک کې د کرونا نزدې پينځه نیم زره مثبتې پېښې مخې ته راغلي دي.

ويل شوي په ملک کې د کرونا وايرس د مثبت پېښو شرح نزدې نهه نيم فيصدو ته رسېدلې، او په دغه وايرس اخته نور اته کسان مړه شوي او دا وخت په ملک د کرونا 908 ناروغان په سخت حالت کې دي.

اېن سي او سي نن د شورو/ چهارشنبې په ورځ ويلي، په ملک کې د کرونا وبا د جاج اخستو پرېکړه شوې چې په بندو ځايونو کې به د ودونو سره نورې دستورې نه راجوړول کيږي.

دغه رنګ ويل شوي د بندو ځايونو نه بهر چې چا ويکسین کړي وي، د 300 پورې کسانو دستوره جوړېدی شي. او دا بندېزونه به د 24 جنورۍ نه عملي کولی شي.

اېن سي او سي ويلي په کومو علاقو کې چې د کرونا وايرس پېښې د لس فيصده نه زیاتې مخې ته راځي، هلته به په سنېماګانو، پارکونو، مزارونو او د ورزش په ځايونو کې د نيمې پورې خلکو ته د حاضرۍ اجازه وي.

د تعلیمي ادارو په اړه ويل شوي چرته چې د کرونا پېښې زیاتې رپورټ کيږي هلته به د 12 کالو نه د کم عمر ماشومان په بدلو ورځو سکولونو او د 12 کالو نه د سېوا عمر ماشومان چې ويکسين يې کړي وي هغه به ټول سکولونو ته ځي.

په وروستيو حکومتي چارواکو ويلي وو، د ملک په غټو ښارونو کراچۍ او لاهور کې د کرونا وايرس زياتې پېښې مخې ته راغلي دي.

اېن سي او سي ويلي کاروبارونه به خلاص وي، او چرته چې کرونا زیاته خوريږي هلته به سمارټ لاک ډاون لګولی شي.

XS
SM
MD
LG