واشنګټن - رویټرز خبري ادارې راپور ورکړی چې اوکراین د جمعې په ورځ ویلي، په ختیځ کې د روسانو په برید کې یې په زیات شمېر کسان وژل شوي خو زیاتوي چې د روسانو مرګ ژوبله تر دوی هم زیاته ده.
د امریکا ولسمشر جو بایډن له کانګرس څخه غوښتي دي چې له کیېف سره دې ۳۳ بیلینه ډالره مرسته وکړي.
ولسمشر ویلادیمیر زیلېنسکي له اوکراین سره د بایډن د مرستې د وړاندیز هرکلی کړی.
دا اندازه تر اوسه له اوکراین سره د یرغل له پیل راهیسې د ترسره شویو امریکايي مرستو لس چنده زیاته ده.
په کیېف کې کارکونکي د استوګنې د هغو سیمو په پاکولو باندې کار کوي په کومو چې له کیېف څخه د ملګروملتونو د سرمنشي انټونیو ګوټېریش د لیدنې په ورځ هم د روسانو دوه توغندي لګېدلي دي.
اوکراین دغه برید خپله په ملګروملتونو باندې برید بللی.
رویټرز لیکي، د اوکراین په شمال کې په پلازمېنه کیېف کې د روسانو له ناکامۍ وروسته اوس هغوی هڅه کوي چې په ختیځ کې دوه ولایتونه په بشپړه توګه ونیسي چې د ډانباس په نامه یادېږي.
اوکراین دغلته د تېرې اونۍ راهیسې چې د روسانو بریدونه پیل شوي د ځینو ښارونو او کلیو د لاسه ورکولو خبر ورکړی خو دا یې هم ویلي، چې دغه لاسته راوړنه ماسکو ته په ډېره لویه بیه تمامه شوې.
د اوکراین د ولسمشر سلاکار اولېکسي اریستوېچ ویلي، "مونږ زیات کسان له لاسه ورکړي خو د روسانو تلفات تر دې هم ډېر زیات دي. د هغوی زیانونه ډېر درانه دي."
له اوکراین سره د لسګونو بیلیونو ډالرو د مرستې له زیاتولو سره بایډن په دغې جګړه کې د امریکا ښکېلتیا په ډرامټیکه توګه زیاته کړې.
امریکا او متحدین یې دا مهال اوکراین ته درنې وسلې استوي چې واشنګټن وايي، نه یواځې د روسانو د برید د مخنیوي لپاره بلکه د دې لپاره چې د روس وسلوال ځواکونه کمزوري کړي تر څو بیا خپل ګاونډیان و نه وېروي.
بایډن ویلي، "مونږ د ازادۍ په جګړه کې د اوکراین د ملاتړ لپاره دې بېل ته اړتیا لرو."
هغه زیاته کړې، "د دې جګړې بیه کمه نه ده خو پر نورو د یرغل لوږه به تر دې هم زیاته بیه ولري."
زیلېنسکي په یو ټویټ کې لیکلی، "د امریکا ولسمشر او خلکو څخه له اوکراین سره د مرستې په برخه کې مننه کوم ، مونږ د ډیموکراسۍ او ازادۍ په څېر له ګډو ارزښتونو څخه دفاع کوو. مونږ د مرستې قدرداني کوو. نن ورته تر بل هر وخته زیاته اړتیا ده."
روس ویلي، اوکراین ته د لویدیځ د وسلو رسېدل دا معنی لري چې دوی اوس د ناټو په وړاندې پراکسي جګړه کوي.
ولسمشر ویلادیمیر پوتین په روانه اونۍ کې د دې په غبرګون کې یو نا څرګند ګواښ کړی وو خو د بهرنیو چارو وزیر یې د اټومي جګړې خبرداری ورکړی.
د جګړې له ډګره:
د زېلینسکي دفتر ویلي، روسانو په ختیځ ډونیڅک سیمه کې په ټولې لومړۍ کرښه باندې د راکټونو، توغندیو او بمونو بریدونه کړي.
د اوکراین لوی درستیز ویلي، چې روسانو د دې لپاره دا بریدونه کول چې اوکراینیان بیا راټولېدو ته پرې نږدي.
برتانیې ویلي، جګړه په ځانګړي ډول لسېچنسک او سیوېروډونیڅک ښارونو کې زیاته وه چې د دانباس اصلي ځایونه بلل کېږي چې روس یې لا تر اوسه د نیولو هڅه کوي.
د برتانیې د دفاع وزارت ویلي، د اوکراینیانو د سخت مقاومت له امله د روسانو لخوا د سیمو نیول محدود دي او روسي ځواکونو ته درانه زیانونه اوښتي دي.
