واشنګټن - د امریکا د کیلي فورنیا ریاست په مونټیري پارک ښار کې د خلکو په ګڼې ګوڼې ګوله باري شوې او لس کسان وژل شوي دي. د لاس انجلس ضلعې د پولیسو ادارې ویلي چې د خالي/شنبې ماسخوتن په یو بالروم کې دننه چېرته چې خلکو نڅا کوله، دا ډزې وشوې. تر اوسه د دې حملې وجه نده معلومه.
شکمن وسله وال تن د پېښې د ځایه تښتېدلی او چارواکو د اتوار/یکشنبې په ورځ وویل چې پولیس اوس هم کوښښ کوي هغه پیدا کړي.
په ډزو کې لس کسان وژل شوي او لس نور زخمیان شوي چې په هغو کې د یو تن حالت ډېر د اندېښنې وړ بلل شوی دی.
د امریکا د مطبوعاتو ترمخه، ډزې د شپې لس بجو نه پس هغه ځای ته نږدې وشوې چېرته چې د چین د نوي کال د لمانځلو دستوره روانه وه. مانټیري پارک د لاس انجلس ښار د مرکز نه شاوخوا یوولس کلومټره لېرې پروت دی.
په سوشل مېډیا باندې داسې ویډیوګانې مخې ته راغلي چې زخميان په اېمبولنسونو کې هسپتال ته لېږدول کیږي او پولیسو د واقعې ځای کلابند کړی او ورته شاوخوا ولاړ دي.
د شنبې/خالي په ورځ، د دې پېښې نه وړاندې لسګونه زره کسانو د چینائیانو د نوي کال د لمانځلو په فېسټیوال کې برخه اخیستې وه.
د لاس انجلس ټایمز اخبار د پېښې د ځای سره نږدې د یو رېسټورنټ د مالک له قوله لیکلي چې د ډزو د یرې خلک د هغه رېسټورنټ ته هم ننوتل او ویل یې چې یو کس د ماشینګڼې سره په سیمه کې ګرځي.
