واشنګټن - مېتا کمپنۍ چې فېسبوک، انسټاګرام او وټساپ ورپورې اړه لري، د ټوېټر غوندې یو تازه پلېټفارم پرانېست چې ټرېډز (Threads) نومیږي او مقصد یې حریف پلېټفارم ټوېټر ته چلېنج جوړول دي. د ټرېډز د پرانېستې وروستو، په لسهاوو میلینه کسانو په هغه کې اکاونټونه جوړ کړل.
ټرېډز د شورو/چهارشنبې په ورځ په امریکا او څه باندې سل (۱۰۰) نورو ملکونو کې لانچ/پرانېستل شو.
د زیارت/پنجشنبې ورځې په سهار د مېتا کمپنۍ مشر مارک زوکربرګ پخپلې ټرېډز پاڼې کې ولیکل چې دېرش میلینه کسانو په دغه نوي پلېټفارم کې اکاونټونه پرانېستي دي.
هغه په خپلې لیکنې کې زیاته کړې: «داسې احساس کیږي چې یو خاص څه پیل شوی وي، خو مونږ ته ډېر کار کول دي چې دا اېپلېکشن جوړ کړو.»
ټرېډز د انسټاګرام اېپ غوندې یو پلېټفارم دی، مګر پر متن مبني دی. انسټاګرام هم د مېټا کمپنۍ اېپ دی.
مېتا کمپنۍ وایي چې ټرېډز «د وخت په وخت تازه معلوماتو او د عوامي خبرو اترو دپاره یو نوی او جدا ځای» دی.
ټرېډز ته په ګڼ شمېر کې د خلکو ورتګ، ممکن د دې څرګندونه کوي چې صارفین د ټوېټر نه بغیر د یو متبادل پلېټفارم په لټون کې دي. ټوېټر تېر کال اېلن مسک په څه باندې څلوېښت بلینه ډالر واخېست او د هغه وخت راهیسي له ستونزو سره مخ دی. داسې ښکاري چې د ټوېټر د دې حالت نه، مېتا کمپنۍ د یو فرصت په حیث ګټه اخېستې او خلکو ته یې یو متبادل پلېټفارم وړاندې کړی دی.
د ټوېټر په شان، ټرېډز کې هم صارفین کولی شي لنډ متنونه پوسټ کړي، د نورو پوسټونه (ټرېډونه) لایک کړي او یا یې ري-پوسټ یا شریک کړي. په ټرېډز کې د هر پوسټ ګنجایش تر پنځه سوه کرېکټرو پورې دی او صارفین کولی شي لېنکونه، عکسونه او ویډیوګانې چې د پنځو مېنټو نه زیاتې نه وي، هم خپرې کړي. مګر په ټرېډز کې د نېغ په نېغه یا ډایرېکټ مسېج آپشن تر اوسه نشته.
په یورپي اتحاد کې تر اوسه ټرېډز ته رسایي نشته، او وجه یې د ضابطو فکرمندي ده.
ټرېډز د یو مستقل اېپ په توګه د رسایي وړ دی، مګر صارفین کولی شي د خپل انسټاګرام په آی ډي او پاسوورډ هلته دننه شي. انسټاګرام کې هره میاشت د فعالو صارفینو شمېر د دوه بلینه څخه ډېر دی، او په دې سره به ټرېډز اېپ ته هم په کم وخت کې زیات شمېر صارفین ورشي چې دا پخپله، د ماهرینو په وینا، ټوېټر ته یو لوی چلېنج ګڼل کیږي.
د ټوېټر نوې سي اي او، لېنډا یاکارینو د زیارت/پنجشنبې په ورځ، بغیر د دې چې د ټرېډز نوم هم واخلي، وویل: «اکثره زمونږ تقلید کیږي، مګر ټوېټر کامیونیټي هېڅ کله نقل کېدلی نشي.»
