روئټرز - د چین د سمندري قواوو یوه ډله جهازونه د اتوار/یکشنبې په ورځ د جاپان سمندر په لور حرکت وکړ چې هلته کې د روس د سمندري او فضايي قواوو سره په پوځي مشقونو کې برخه واخلي. د چین دفاع وزارت د دې مشقونو مقصد، "اوبو کې د سټراټېجیکو لارو د امن تحفظ" بللی دی.
د دې مشقونو خفیه نوم "شمالي/انټر اېکشن-2023" دی او په اوکراین باندې د روس د یرغل نه پس، د بجینګ او ماسکو ترمنځ د پراخو پوځي همکاریو څرګندونه کوي. دواړه ملکونه په داسې حال کې دا مشقونه پیل کوي چې امریکا د چین سره د پوځي رابطو دپاره د چېنلونو غوښتنه کوي مګر چین په مکرره توګه دا مطالبه رد کړې ده.
د چین د سمندري ځواکونو د جهازونو په دې ډله کې چې د مشق دپاره تللي دي، پنځه جنګي کښتۍ او څلور سمندري هلي کاپټرې شاملې دي. د چین دفاع وزارت د اتوار/یکشنبې په ورځ په یو بیان کې ویلي چې د دوی د سمندري ځواکونو دا ډله د چنګداو شرقي بندر څخه حرکت کړی او په یوه ځانګړې سیمه کې به د روسي جهازونو سره یوځای شي.
د چین سرکاري اخبار، ګلوبل ټایمز د پوځي مشاهدینو له قوله لیکلي، دا به وړومبی ځل وي چې چین او روس په دغسې مشترکو مشقونو کې برخه اخلي.
د روس دوو جنګي کښتیو د دې میاشتې په سر کې، په شانګهائی کې د چین له سمندري قواوو سره د حرکاتو، رابطې جوړولو، او په سمندر کې د ژغورنې د عملیاتو په برخو کې جدا مشق هم ترسره کړی و. د روس هماغه کښتۍ اوس د جاپان په سمندر کې مشترک پوځي مشق ته آمادګی نیسي.
وړاندې له دې چې روس په اوکراین حمله وکړي، صدر پوټین او صدر شي جن پنګ اعلان کړی و چې د دوو ملکونو ترمنځ د پراخ شراکت مقصد، د امریکا د اثررسوخ سره مقابله کول دي. د دې شراکت یوه د پام وړ برخه، پوځي همکارۍ دي.
په همدې جولای میاشت میاشت کې د چین دفاع وزیر لي شانګفو د روس د سمندري قواوو د مشر اډمېرل نیکولای یفمینوف سره وکتل او دواړو اړخونو وعده وکړه چې پوځي تعلقاتو ته به وسعت ورکوي.
